May Fouad

08/07/2026

⁨ ⁨ الصور دي صور عشوائية أخدتهم في اول يوم ليا لما روحت فيلاديلفيا
اخدت قرار النقل بسرعه جداً وبطريقه مش محسوبه على غير العادة بس مكنش اودامي غيرها في التوقيت دا
كان وقت صعب اوي عليا وكنت رايحه هناك وانا مرعوبه انها مش مكان امان وكنت بسمع كتير ان فيلاديلفيا دي معدل الجريمه فيها عالي وكلام كتير يخوف ، سافرت من الكويت في شهر ١٢/٢٠٢٤ ودي كانت آخر مره روحت فيها الكويت وصلت فيلاديلفيا الساعه ٦ المغرب في يوم كله تلج والدنيا كانت ضلمه بالمناسبه كنت رايحه اعيش مع بنت صاحبتي في بيزمنت عباره عن اوضه وصاله ومكنش لسه فيه اي عفش بس هي كانت جايبالي مرتبه هوا
الوضع كله كان تحت الصفر بس اول مره كنت احس في امريكا ان أنا في مكان أمان وانا لوحدي! مش متضايقه!
كنت جايه من سفر ١٦ ساعه طبعاً اتقتلت نوم وصحيت الصبح اتسحبت براحه وخرجت استكشف الوضع بعد ما الشمس طلعت ، الجو كان تلج بعد ما مشيت حوالي ١٥ دقيقه مش عارفه اصلاً أنا رايحه فين لقيت دانكن دونتس قولت ادخل اتدفى شويه واشرب قهوه لقيتني بسألهم على شغل ولقيت كل الناس اللي جوا مسلمين وعملت انترفيو وانا بشرب القهوه واتقبلت في نفس اليوم واتفقنا هبدأ شغل بعد يومين ♥️🇺🇸
نسيت أقولكم ان قبل ما اغمض عيني يومها بليل قولت أنا هصحى الصبح وهلم حاجتي وأطلع على نيويورك بس القدر كان له رأي تاني ، روحت وانا بقول لصاحبتي تخيلي لقيت شغل! قالتلي كنت عارفه اه الشغل هنا سهل اوي تعالي بقا اعرفك على جارتنا ، طنط مصريه برضو ساكنه في البيزمنت اللي جنبنا وعلى عكس طبيعتي اللي مبتحبش تتعرف على حد روحت ودخلت بيتها وحسيت احساس عمري برضو ما حسيته هنا حسيت ان أنا في مصر بيتها بيت مصري والقرآن شغال والبخور وهي ست جميله اوي ( كل دا كان ربنا بيقولي مترجعيش نيويورك )
عاوزين تعرفو حصل ايه بعد كدا

#نيويورك #فيلاديلفيا

05/18/2026

اكبر فخ هتقع فيه في حياتك هو انك تأجل تعيش لحد ما حاجات معينه تحصل عشان الحاجات المعينه دي ممكن متحصلش وتكتشف انك مش عايش لفترة كبيره اوي على أمل ان في حاجه هتحصل!

بقالي فتره كدا ملاحظه ان أنا عايشه في الماضي عايشه في لحظات بتمنى انها ترجع تاني في قرارات بتمنى ان مكنتش اخدها في حياتي دايماً بقيت شايفاني زمان ومبقتش بعرف اشوفني في الفترة الحاليه والحقيقه ان دا شئ مرهق جداً لإنه بيخليك دايماً بتحاسب نفسك على حاجات عملتها وبعد فترة أدركت انك مكنش المفروض تعمل كدا بس الفترة دي هي فترة نضوجك

الفترة دي للأسف بتكون شايف كل حد على حقيقته وبتطلع بقا من نعيم الجهل اللي كنت عايش فيه للأسف .

الغربه في امريكا خصوصاً هتعلمك تشوف نفسك على حقيقتها وتشوف الناس كمان على حقيقتها .
ممكن زمان كنت بحس بطاقة اللي اودامي بس كنت دايماً بعيش على أمل ان اطلع غلطانه ( كنت بحاول أجمل الصورة ) بس حالياً للأسف بقيت بشوف الصورة زي ما هي .
أمريكا علمتني دا 🇺🇸

04/25/2026

04/13/2026

العمر بيعدي بسرعه متخلوش حاجه توقفكم عن الانبساط بكل لحظه فيه
ولا اشخاص ولا مواقف
خليكو دايماً قادرين تبدأو من جديد♥️🇺🇸

03/21/2026

الصور اللي شايفينها دي اي حد هيشوفها هيشوف انها صور عاديه يعني مطبخ وحلل وشوية معالق بس دي كانت في يوم من الأيام رأس مالي وجزء من مشروع بسيط اتعمل بحب ووصل للناس بكل حب وعشان كدا نجح وكسر الدنيا كمان ♥️
دايماً لما بشوفها بحس فيها بدفا وحب ، كل ركن فيها بيحكي عن حكاية اوردر أنا عملته والحقيقه أنا ممتنه جداً على صعوبة الأيام اللي مريت بيها من ساعة ما وصلت أمريكا لأن الايام دي ساعدتني أتعرف على نفسي وأعرف أنا مين؟ أنا بحب اعمل ايه؟ او أنا اختارت اكون فين
وجودي في الكويت مكنش اختياري كان قدر ومكتوب وسفري لأمريكا كمان مكنش اختياري بس رجوعي ليها كان اختياري أنا
يعني كنت دايماً بقدم في الكويت على شغلانات ليها علاقه بمجال دراستي وهي المكتبات كنت راضيه وموافقه اشتغل شغلانه روتينيه عمري ما فكرت مثلاً افتح شركه او اعمل مشروع يكون بتاعي ( علشان مبحبش المجازفه) بحب الحياه الروتينيه وكنت سعيده بأي حاجه في حياتي بس لما خرجت بره النقطه دي وسافرت امريكا ولقيت الضغط الفظيع في الحياه هنا لقيت نفسي بطبخ ! ولقيت نفسي عندي مشروعي !
اكتشفت طباع فيا مكنتش اعرف انها موجوده
اكتشفت حياه عمري ما كنت اتخيل ان ممكن أعيشها
شفت ناس كان وجودها درس ليا وشفت ناس اتعلمت منهم حاجات كتير

ربنا دايماً كان محاوطني بكرمه ولطفه ولسه الحمدلله
في المطبخ دا سمعت صوتي وانا فرحانه بأول اوردر وانا فرحانه لما شفت اسمي في الجرايد لما عملت مداخلات تليفونيه .
ممتنه جداً لكل اللي حصل في حياتي خلاني اتغير للأحسن وأعرف أنا عاوزه ايه وممتنه كمان لكل حكايه حصلت سواء حلوه او وحشه هحكيها لما اكبر وأختمها وانا بقول بس عدت بفضل ربنا ♥️
زي ما بحكي ليكو حالياً حكاية مطبخ بسيط اتعمل بحب ووصل لكل الناس بحب برضو وبقا بطل حكايتي النهارده♥️🇺🇸

#امريكا #مطبخ

03/19/2026

كل سنه وانتو طيبين عيد سعيد عليكم يارب♥️
حابه اقول ان الهجرة لسه مفتحتش كل اللي حصل انهم نزلو تعديلات على النظام وهي ان جواز السفر بقا شرط أساسي في التقديم وان التقديم هيكون بدولار واحد للفرد بعد ما كان مجاني
بس لسه مفيش اي اخبار هتفتح امتى وكدا كدا أنا كنت بنصح اي حد بيقدم معايا انه يطلع جواز سفر متسمعوش كلام حد بيقول انها فتحت وحالياً كل اللي عليكو تعملوه ان اي حد معندوش جواز سفر يبدأ يطلعه
وبس كدا 🇺🇸
😍

03/10/2026

الصورة دي أخدتها اول مره جيت امريكا كانت أول كوباية قهوه اشربها في امريكا اول ما صحيت تاني يوم والحقيقه ان نظرتي لكل حاجه وقتها كانت مختلفه تماماً أنا في امريكا!! تحديداً في نيوجيرسي كان جوايا احساس غريب هو ايه العالم اللي بره دا ويا تري هقابل وهشوف مين ويا تري هيحصل ايه
وفاكره أول مره طلعت من باب الفندق دقات قلبي كنت سمعاها وأول مره شفت واحده سكرانه اودامي كنت حاسه وقتها ان أنا بحلم ويارب أصحى بقا
كنت شايفه الدنيا ضيقه اوي في عيني وبسأل نفسي أنا ليه جيت هنا؟
الكلام دا في نظر ناس كتير هيشوفوه أڤوره وان امريكا دي حلم ناس كتير
مش هنكر ان شفت فيها حاجات حلوه كتير بس الحياه هنا شبه الجيش
روتين ثابت مينفعش تتخلف عنه كل يوم مينفعش تغيب يوم واحد انت مضطر تكمل حتى وانت تعبان مفيش رفاهية انك محتاج تكتأب شويه
الحياه هنا هتكمل يعني هتكمل ، هتكتسب طباع مش فيك هتحاول طول الوقت تجاهد انك متبقاش نسخه من ناس قبلك عاشو الحياه دي وكانو برضو بيقولو فتره وهتعدي وهنرجع لحياتنا تاني بس الحقيقه انهم بقو نسخ من ناس تانيه قابلوهم وكانو بيضحكو على كلامهم وبعد كوباية القهوه دي ما خلصت اهو فات ٣ سنين و ٣ شهور حاسه فيهم بإنجاز كبير اوي ان لسه زي ما أنا ♥️🇺🇸

02/25/2026

عيدك يا كويت احلى عيد♥️🇰🇼
كل عام والكويت احلى بلد🇰🇼
#كويت

01/25/2026

اخبار العاصفة ايه يا جماعه؟ اكتب ولايتك ليه والجو عامل ايه عندكم حالياً؟👀