14/09/2026
Mamlaka ya Viwanja vya Ndege Tanzania (TAA) imesherekea ushindi wa Kiwanja cha Ndege cha Kimataifa cha Julius Nyerere ambacho hivi karibuni kimenyakua tuzo ya kimataifa ya World Travel Awards kwa kuandaa bonanza lililowakutanisha wafanyakazi wa TAA na wadau mbalimbali wa sekta ya usafiri wa anga katika viwanja vya Chuo Kikuu cha Dar es Salaam (UDSM).
Bonanza hilo lilihusisha michezo mbalimbali, ikiwemo mpira wa miguu, kuvuta kamba, mbio za magunia, kukimbiza kuku pamoja na mbio za masafa mafupi na marefu, ikiwa na lengo la kuimarisha afya, umoja, upendo na mshik**ano miongoni mwa washiriki.
Katika bonanza hilo, Mkurugenzi Mkuu wa TAA, Bw. Abdul Mombokaleo, amewahimiza wafanyakazi na wadau wa sekta ya usafiri wa anga kujenga utamaduni wa kufanya mazoezi mara kwa mara ili kuimarisha afya na kuongeza ufanisi katika utekelezaji wa majukumu yao.
Amesema bonanza hilo pia lilikuwa sehemu ya kusherehekea na kupongezana kufuatia JNIA kutwaa tuzo ya kiwanja bora cha ndege Afrika 2026, ushindi ambao umeifanya Tanzania kupokea tuzo hiyo kwa mwaka wa pili mfululizo.
Katika mchezo wa mpira wa miguu uliofanyika kwenye bonanza, timu ya TAA iliibuka na ushindi wa mabao 2-0 dhidi ya timu ya wasanii wa muziki wa Bongo Fleva.
Mkurugenzi wa Rasilimali Watu na Utawala wa TAA, Bi. Irene Minja, amewashukuru wafanyakazi na wadau kwa mchango wao katika kuiwezesha JNIA kutwaa tuzo hiyo, akieleza kuwa bonanza hilo pia limekuwa fursa ya kujenga mahusiano, kuimarisha ushirikiano na kuongeza ari ya kufanya kazi kwa pamoja.
Aidha, TAA imetangaza mpango wa kuanzisha Airport Marathon, itakayowakutanisha wafanyakazi na wadau wa viwanja vya ndege katika shughuli za michezo na mazoezi, huku taasisi nyingine zikialikwa kushirikiana na TAA katika mabonanza na shughuli nyingine za kuimarisha afya na mshik**ano.
