22/06/2024
وزٹ ویزے پر حج کا نقصان
بتایا جاتا ہے کہ اس سال تاریخ کی شدید ترین گرمی میں وزٹ ویزوں پر لاکھوں لوگ حج کرنے آئے ہیں ۔ لاکھوں کا اندازہ آپ اس سے بھی لگا سکتے ہیں کہ لاکھوں گرفتار بھی ہوئے جس میں بڑی تعداد مصریوں کی بتائی جارہی ہے ۔
شدید ترین گرمی میں وزٹ ویزے پر آئے ہوئے لوگ خیموں میں نہیں ہوتے یعنی ان کی پراپر کوئی جگہ نہیں ہوتی جہاں وہ آرام کر سکیں یوں پورا پورا دن گرمی میں باہر چھپتے چھپاتے گزر جاتا ہے جس سے انرجی ڈاؤن ہوجاتی ہے اب اس حال میں جب یہ بندہ حج کے کسی رکن کیلئے پیدل نکلتا ہے تو چکر آنے لگتے ہیں اور بیہوش ہوجاتا ہے ۔
اگر وزٹ ویزے والوں کی انرجی ڈاؤن نہ ہو بلکہ خوب آرام کر رکھا ہو گرمی میں خوب لمبا چل بھی سکتے ہوں لیکن جب یہ کسی رکن کی ادائگی کیلئے نکلیں اور راستہ جام کرنے کا سبب بن جائیں جس سے دیگر حاجیوں کو تکلیف ہو اور گھٹن کی وجہ سے دیگر حاجیوں کی ہلاکتیں ہوجائیں تو اس کا ذمہ دار کون ہوگا ؟
غیر قانونی افراد کے رش کی وجہ سے میٹرو ٹرین بند کر دی جائے یا رمی کیلئے شیٹ کے نیچے سے چھاوں میں چلنے والا راستہ بھی بند کردیا جائے یوں دوسرے گرم راستوں پر بوڑھے یا کمزور حاجیوں کی اموات ہوجائیں تو ذمہ داری کس کس پر آتی ہے ؟
انتظامیہ سے کہیں نا کہیں کوتاہی ہوئی ہوگی مگر وزٹ ویزے پر حج کے جواز کیلئے سارا ملبہ سعودی گومنٹ پر ڈالنا بالکل غلط ہے ۔
سادہ سا سوال ہے آپ نے شادی میں 400 افراد کو مدعو کیا ہو اور انتظام 425 کا کیا ہو جبکہ پروگرام میں 500 افراد آجائیں جس کے نتیجے میں ۔۔۔۔
کرسیاں کم پڑ جائیں ۔
پینے کا پانی ختم ہوجائے ۔
کھانا کم پڑ جائے ۔
واش روم پر رش پڑ جائے ۔
واش روم کا پانی بھی ختم ہوجائے ۔
شادی ہال میں گھٹن ہوجائے ۔
پارکنگ کی جگہ کم پڑ جائے ۔
نتیجہ یہ کہ آپ کے اصل مہمان ناراض ہوکر چلے جائیں اور آپ لاکھوں روپے خرچ کر کے بھی بے عزت ہوجائیں تو کیا ان 75 افراد کیلئے جواز ڈھونڈ نکالیں گے ؟
