05/07/2026
حج مکمل طور پر ڈیجیٹل دور میں داخل، صرف 14 دن میں 2 لاکھ 32 ہزار سے زائد عازمین گھر بیٹھے رجسٹرڈ
پاک حج ایپ اور آن لائن حج پورٹل کے ذریعے رجسٹریشن کا سلسلہ جاری، سرکاری اسکیم کو نمایاں ترجیح، نئی ہدایات تک رجسٹریشن بلا تعطل جاری رہے گی
(اسلام آباد: 5 جولائی، 2026)
حج انتظامات کو جدید خطوط پر استوار کرنے کی حکومتی پالیسی کامیابی سے آگے بڑھ رہی ہے۔ وزارت مذہبی امور و بین المذاہب ہم آہنگی کے مطابق حج 2027 تا 2030 کے لیے آن لائن رجسٹریشن مہم کو عوام کی بھرپور پذیرائی حاصل ہوئی ہے اور صرف پہلے 14 دنوں میں 2 لاکھ 32 ہزار سے زائد خواہشمند عازمین حج نے گھر بیٹھے اپنی رجسٹریشن مکمل کر لی ہے۔
ترجمان وزارت مذہبی امور نے بتایا کہ نیشنل آئی ٹی بورڈ کی تیار کردہ "پاک حج" موبائل ایپ اور آن لائن حج پورٹل کے ذریعے رجسٹریشن کا عمل انتہائی آسان، تیز، محفوظ اور شفاف بنایا گیا ہے۔ اس جدید نظام نے عازمین کو بینکوں اور دفاتر کے طویل چکروں سے نجات دلائی ہے اور چند منٹ میں رجسٹریشن کی سہولت فراہم کی ہے۔
اعداد و شمار کے مطابق 1 لاکھ 75 ہزار عازمین نے سرکاری حج اسکیم جبکہ تقریباً 58 ہزار عازمین نے پرائیویٹ حج اسکیم کے تحت رجسٹریشن کرائی۔
صوبہ وار اعداد و شمار کے مطابق پنجاب سے 1 لاکھ 8 ہزار، سندھ سے 71 ہزار، خیبر پختونخوا سے 33 ہزار، اسلام آباد سے 11 ہزار، بلوچستان سے 7 ہزار، آزاد جموں و کشمیر سے 1 ہزار 500 اور گلگت بلتستان سے 700 افراد رجسٹرڈ ہوئے ہیں۔
رجسٹرڈ عازمین میں 1 لاکھ 36 ہزار مرد جبکہ 96 ہزار خواتین نے حج کی ادائیگی کے لیے اپنی دلچسپی کا اظہار کیا۔
ترجمان وزارت مذہبی امور نے واضح کیا کہ آئندہ مرحلے سے متعلق ہدایات موصول ہونے تک حج 2027 تا 2030 کے لیے آن لائن رجسٹریشن کا عمل جاری رہے گا۔ وزارت نے تمام خواہشمند عازمین حج سے جلد رجسٹریشن مکمل کرنے کی ہدایت کی ہے تاکہ وہ آئندہ حج پالیسی کے تحت اپنی اہلیت برقرار رکھ سکیں۔
Web: https://hajj.mora.gov.pk/login
Andriod: https://play.google.com/store/apps/details
iOS: https://apps.apple.com/us/app/pak-hajj/id6473727234
