07/03/2026
خرم سعید خان کے گھر دعوتِ افطار !
گھٹن زدہ ماحول میں تازہ ہوا کا جھونکا !
سیرو سیاحت کے دلدادہ قبیلے والوں کے سنگ گزرے یادگار پل !
گو کہ یہ اللہ کی رحمتوں اور برکتوں والا ماہ رمضان ہے جس کی ہر ساعت مقدس ہے کہ یہ ماہِ نزولِ قرآن بھی ہے لیکن دنیا بھر اور خصوصاً ہمارے خطّے کے آسمان پر منڈلاتے جنگ و جدل کے بادلوں کے باعث دل بوجھل اور ذہن پریشان ہے ، ایسا لگتا ہے کہ گویا ہر سو وحشت کا راج اور بربریت کا ناچ جاری ہے ،، زمین پر خدا بنے ہوئے خوں آشام درندوں کی وحشت و بربریت غزہ میں ہزاروں فلسطینیوں کی نسل کشی اور قتلِ عام کرچکی ،، مظلوموں کے لہو سے رنگی یہ سرخ آندھی بارود کی بُو سنگ سنگ لئے ہمارے پیارے ملک پاکستان کی مغربی سرحدوں تک آن پہنچی ہے ،، ویسے ہی گزشتہ دو ڈھائی برس سے ہمارے ملک کے اندرونی حالات بھی مبتلائے بدامنی و بے سکونی ہوتے چلے آئے ہیں ،، جس کے باعث ملکی سیاحت رفتہ رفتہ اس بدامنی و بے سکونی کی دھند میں جا پھنسی ہے ،، راہوں کے پرخطر ہو جانے کے باعث سفر مشکل سے مشکل تر ہوتے چلے جارہے ہیں ،، ہم سیاحوں کے قدم اٹھنا چاہتے ہیں لیکن سنگینی حالات کے باعث تھم تھم جاتے ہیں ،، پھر ستم بالائے ستم کہ پیٹرول اور ڈیزل کی روزافزوں بڑھتی اور آسمان کو چھوتی قیمتوں نے بھی سواریِ سفر کے پہیوں کو جام کرکے رکھ دیا ہے ،، اِک کیفیتِ جمود ہے کہ ہم اُڑان بھر کر پیارے وطن کی دلکش و خوبصورت وادیوں کا رُخ کرنا چاہتے ہیں لیکن صرف اپنے پر پھڑپھڑا کر رہ جاتے ہیں ،، ایک گھٹن سی ہے کہ جس میں خود کو قید پاتے ہیں ،،
ہم کہ جو سیاحت کے شوقین ہی نہیں بلکہ مجنوں ہیں ،،
گھر کہاں در کہاں دیار کہاں
مبتلائے جنوں کو بھلا قرار کہاں
پکارے فطرت لبیک روح کہے
رکتے نہیں قدم کہ اختیار کہاں
ایسے گھٹن زدہ ماحول میں ہمارے سیاح دوست خرم سعید خان نے سیرو سیاحت کے دلدادہ قبیلے والوں کو اپنے ہاں دعوتِ افطار پر مدعو کیا تو قبیلے والے دوست احباب کے ساتھ مل بیٹھ کر اور گپ شپ لگا کر ایسا محسوس ہوا کہ ماحول پرطاری گھٹن میں جکڑی فضا میں تازہ ہوا کا خوشگوار جھونکا روح کو تروتازہ کرگیا ہو ،، دل کی گہرائیوں سے خرم بھائی کا شکرگزار کہ انہوں نے سیاحت کی قبیل سے تعلق رکھنے والوں کو چند پلوں کے لیے یکجا کرکے ہمارے مضطرب دلوں کو سکون اور بوجھل ذہنوں کو تازگی بخشی ،، اللہ سے دعا ہے کہ وہ خرم بھائی کے رزق میں کشادگی عطا فرمائے ، ہمارے پیارے ملک کو امن و سکون کا گہوارہ بنادے اور اس خطے اور پوری دنیا سے وحشت و بربریت کا خاتمہ فرمائے آمین ثم آمین 🙏
