09/06/2026
Assalamu Alaikum dosto!
Umeed hai aap sab khairiyat se honge. Allah Pak aap sab ko hamesha khairiyat se rakhe. Alhamdulillah main bhi khairiyat se hoon.
1/2-May-2026 (Friday/Saturday) Labour Day ke din main aur mere friends ne 27-Up Shalimar Express par Karachi se Lahore tak travel kiya. Mere ek dost Karachi Cantt Station se train mein sawar hue, jabke hum do dost Drigh Road Railway Station se onboard hue.
Yeh safar AA Enterprises ki taraf se tha aur humein AC Standard Class coach mili. Jaisa ke maine video ke shuru mein kaha tha ke jo bhi cheez ghair munasib lagi usay highlight kiya jayega, lekin Alhamdulillah sab kuch kaafi acha nikla. Train ko kaafi behtareen tareeqe se maintain kiya gaya tha, khaas taur par AC coaches aur Economy Class ki condition doosri trains ke muqable mein kaafi achi thi.
Hum ne apne safar ka aaghaz Drigh Road Railway Station se kiya. Is ke baad pehla stop Landhi aaya aur Landhi ke baad humein nashta serve kiya gaya. Nashtay ke baad Kotri Railway Station par hamari coach damage ho gayi thi, jaisa ke aap video mein dekhenge. Coach ko decouple karne ke baad hamari train dobara rawana hui.
Us ke baad Hyderabad aaya aur Hyderabad se rawangi ke baad safar mazeed behtar hota gaya. Raaste mein shadeed garmi thi, is liye hum ne aaram se apna safar continue kiya, jis ki wajah aap ko aage chal kar video mein pata chal jayegi.
Phir Rohri aaya aur Rohri ke baad hum ne lunch kiya. Is ke baad train ne Ghotki mein stop kiya aur phir safar mazeed aage badhta gaya. Dheere dheere shaam hoti gayi aur aakhirkar hamari train Khanpur Railway Station pohanch gayi.
Filhaal hum Khanpur Railway Station par mojood hain, aur ab humein yahan se rawangi leni hogi.
Toh khair, Part 1 mein aap ne yeh sab dekha — ab baari hai Part 2 ki!
Toh Khanpur Railway Station par chand minute rukne ke baad hamari train wahan se rawana ho gayi. Is ke baad humein intehai dilkash sooraj ke ghuroob hone ka manzar dekhne ko mila, jo safar ko aur bhi khoobsurat bana raha tha. Saath hi hamari train Punjab mein bhi dakhil ho chuki thi, jis ki wajah se mausam thanda aur khushgawar ho gaya tha.
Phir raat hote hi chandni raat aur chamakta hua chand dekhne ko mila, jo is safar ko mazeed haseen bana raha tha. Itne tak hamari train Bahawalpur pohanchi, aur Bahawalpur ke baad Multan aaya.
Multan ke baad Toba Tek Singh aaya, aur Toba Tek Singh ke baad raaste mein kuch trains ke saath crossings miss ho gayin, jis ka kaafi afsos hua — lekin khair, safar mein jo naseeb mein hota hai wohi hota hai.
Is ke baad Faisalabad aaya, aur isi tarah safar jari rakhte hue aakhirkar hum raat ko Lahore pohanch gaye.
Yun yeh shandaar aur yaadgaar safar apne ikhtitam ko pohanch gaya ✨❤️
Agar video pasand aaye to Like 👍, Share 🔄 aur Subscribe zaroor karein.
Shukriya❤️
AA Enterprises
