08/09/2025
🎄 بے جا تنقید 🌲
اس وقت موجودہ زمانے میں ہمارے آس پاس خلوص اور محبت کی خاصی کمی نظر آنے لگی ہے،ہر شخص دوسرے کی ٹانگ کھینچنے کی فکر میں لگا رہتا ہے۔سب سے بڑی برائی جو اس وقت ہم میں اور آپ میں موجود ہے وہ بے جا تنقید کی عادت ہے۔وقت بے وقت،وقت اور موقع کا لحاظ کئے بغیر ہم ہر ایک پر طنز اور تنقید شروع کر دیتے ہیں ۔ہم میں سے ہر ایک کو یہ لگتا ہے کہ جو کچھ وہ کر رہا ہے وہ ٹھیک ہے باقی ساری دنیا غلط ہے ،یہ رویہ لوگوں کو ایک دوسرے سے متنفر کردیتا ہے،ایک دوسرے سے بد ظن کر دیتا ہے۔چھوٹی سی ایک مثال ہے کہ میں جس فیملی میں رہتا ہوں،وہاں جتنے لوگ ہیں سب کی اپنی اپنی پرسنل لائف ہے لیکن ہر ایک اپنی فکر اور پریشانی چھوڑ کر دوسرے کی فکر میں اگر لگ جائے گا کہ وہ کیا کر رہا ہے کہاں آرہا ہے کہاں جا رہا ہے ،کیا پہن رہا ہے،کیا کھا رہا ہے ،کس سے بات کر رہا ہے اور کیوں کر رہا ہے تو یہ چیز دوسرے کے لئے ناگوار ی کا باعث ہوگی اور ناقابلِ برداشت ہو گی۔میرے ایک دوست کا کہنا ہےکہ میں نے اپنی بیٹی جب کالج میں داخل کروائی تو اس کو ٹیوشن کی ضرورت محسوس ہوئی ،انہوں نے حسبِ تو فیق سب سے قریبی کوچنگ سینٹر میں اس کاداخلہ کروادیا،یہ داخلہ ہو نا تھا کہ ان کے پورے خاندان میں ایک شور مچ گیا کہ ہمارے تو پورے خاندان میں ایسا کبھی نہیں ہوا کہ ہمارے گھر کی بیٹی کوچنگوں میں جائے ،اور وہاں لڑکوں کے ساتھ بیٹھ کر پڑھے۔اس بیچارے نے بہت سمجھایا کہ ایسا کحچھ بھی نہیں ہےمیں اب علیحدہ سے ٹیوشن کا بندوبست نہیں کر سکتا لیکن ان کے ہاں کئی دن یہ شور شرابا رہا ،اور بالآخر اس بچی کو کوچنگ جانے سے روک لیا گیا۔یہ ایک بہت چھوٹی سی مثال ہے دوسروں کی زندگیوں کو اجیرن بنانے کی ،اس طرح کی حرکتیں کر کے لوگ اپنی اولاد کے لئے بھی آگے تعلیم کے اور آگے بڑھنے کے راستے بند کر دیتے ہیں ۔آج آپ کسی دوسرے پر تنقید کر رہے ہیں کل کوئی دوسرا آپ کے لئے ایسا ہی کوئی گڑھا کھود رہا ہو گا۔اگر یہی لوگ ان کے مسئلے کو سمجھتے ہوئے ان کی پریشانی کو حل کرنے کی کوشش کر رہے ہوتے تو ان کے لئے کتنی آسانی ہو جاتی ،اسی طرح خاندان میں یا دوستوں کی کسی تقریب میں کسی کے لباس پر یا پہناوے پر بلاوجہ تنقید ماحول کو بدمزا کر دیتی ہے ۔ہماری یہ عادت اتنی پختہ ہو چکی ہے کہ ہم لوگ اب راہ چلتے لوگوں کو بھی نہیں بخشتے جن سے ہمارا کوئی واسطہ یا تعلق نہیں ہوتا ۔آج ضرورت اس بات کی ہے کہ بے جا تنقید سے کیسے خود کو اور دوسروں کو بچانا ہے.
