13/02/2026
پاکستان ریلوے کے آن لائن رابِطہ (RABTA) سسٹم کے ذریعے فوجی رعایتی واؤچرز کی بکنگ کا جامع اور مؤثر طریقۂ کار
پاکستان ریلوے کے رابِطہ سسٹم کے ذریعے فوجی واؤچرز پر بکنگ کی سہولت کو مزید وسعت دے دی گئی ہے۔ اس ضمن میں درج ذیل معیاری طریقہ کار جاری کیا جاتا ہے:
1۔ متعلقہ محکمہ جو فوجی اہلکاروں کو رعایتی واؤچر جاری کرتا ہے، وہ اب کاغذی واؤچر کے ساتھ ایک ای-واؤچر نمبر بھی جاری کرے گا۔ مسافر کے پاس دو اختیارات ہوں گے:
(الف) پہلے سے رائج طریقہ کے مطابق ریزرویشن سینٹر جا کر بکنگ کروانا۔
(ب) پاکستان ریلوے کی ویب سائٹ یا رابِطہ ایپ کے ذریعے نشستوں کی پیشگی الاٹمنٹ کی سہولت حاصل کرنا۔
2۔ جو صارف نشستوں کی پیشگی الاٹمنٹ کی سہولت حاصل کرنا چاہے گا وہ پاکستان ریلوے کی ویب سائٹ یا رابِطہ ایپ پر اپنے موبائل نمبر اور ای میل ایڈریس کے ذریعے اکاؤنٹ بنائے گا۔
3۔ اکاؤنٹ بنانے کے بعد صارف مطلوبہ ٹرین میں نشست تلاش کرے گا اور کاغذی واؤچر کے ساتھ جاری کردہ ای-واؤچر نمبر اور مسافر کی مکمل معلومات درج کرے گا۔
4۔ سسٹم ای-واؤچر کی تصدیق کرے گا، اور تصدیق کامیاب ہونے کی صورت میں کرایہ 50 فیصد رعایتی نرخ (MV، MVS، MVSH، MVH، AV، NV کوڈ) کے مطابق کم کر دیا جائے گا۔
5۔ ایک واؤچر پر زیادہ سے زیادہ 6 مسافر سفر کر سکیں گے۔ رابِطہ سسٹم اس امر کو یقینی بنائے گا کہ ایک واؤچر پر 6 سے زائد مسافروں کی بکنگ ممکن نہ ہو۔ فوجی حکام تمام یونٹس کو ہدایت جاری کریں گے کہ 6 سے زائد افراد کے لیے ایک ہی واؤچر جاری نہ کیا جائے۔
6۔ سسٹم میں 50 فیصد رعایتی کرایہ کے ساتھ آرڈر تیار ہوگا اور نشستیں پیشگی الاٹ کر دی جائیں گی۔ ایک عارضی کیو آر کوڈ جاری کیا جائے گا اور صارف کو مقررہ وقت کے اندر رابِطہ ایپ پر دستیاب کسی بھی ادائیگی کے ذریعے 50 فیصد رقم ادا کرنا ہوگی۔ مقررہ وقت میں ادائیگی نہ ہونے کی صورت میں نشست عام مسافروں کے لیے جاری کر دی جائے گی۔
7۔ ادائیگی کامیاب ہونے پر تصدیقی ایس ایم ایس مسافر کو موصول ہوگا۔
8۔ مسافر ٹرین کی روانگی سے کم از کم 4 گھنٹے قبل متعلقہ ریزرویشن سینٹر پر حاضر ہو کر اپنا آرڈر نمبر/ریڈیم کوڈ اور اصل کاغذی واؤچر پیش کرے گا۔ اگر مسافر مقررہ وقت سے قبل حاضر نہ ہوا تو اس کی نشست عام مسافروں کے لیے جاری کر دی جائے گی اور ادا کردہ رقم کا 50 فیصد ضبط کر لیا جائے گا۔
9۔ اگر ٹرین کی روانگی کا وقت رات 9 بجے (2100 گھنٹے) کے بعد ہو تو مسافر کو روانگی کے دن رات 9 بجے سے پہلے اپنا آرڈر نمبر/ریڈیم کوڈ اور اصل واؤچر پیش کرنا ہوگا، کیونکہ ریزرویشن دفاتر کا اوقات کار رات 9 بجے تک ہے۔ بصورت دیگر نشست عام مسافروں کے لیے جاری کر دی جائے گی اور ادا شدہ رقم کا 50 فیصد ضبط ہوگا۔
10۔ مسافر لازماً وہی واؤچر متعلقہ اسٹیشن ماسٹر کے پاس تبدیل کروائے گا جس کا نام کاغذی واؤچر پر درج ہو، مثلاً لاہور، ملتان، کراچی، راولپنڈی وغیرہ۔
11۔ ریزرویشن کلرک کاؤنٹر پر آرڈر نمبر/ریڈیم کوڈ درج کر کے بکنگ کی تفصیلات کو اصل واؤچر سے مطابقت کرے گا، نیز فوجی اہلکار کے عہدے کے مطابق مجاز کلاس کی بھی جانچ کرے گا۔
12۔ اگر تمام تفصیلات درست ہوں تو ریزرویشن کلرک سسٹم کے ذریعے ٹکٹ پرنٹ کرے گا اور واؤچر مقررہ طریقہ کار کے مطابق FA&CAO دفتر جمع کروا دے گا۔ یوں عمل مکمل تصور ہوگا۔
13۔ اگر تفصیلات میں فرق ہو (مثلاً مسافروں کی تعداد یا کلاس وغیرہ) تو ڈیوٹی پر موجود ریزرویشن کلرک کارروائی آگے نہیں بڑھائے گا بلکہ آن لائن بکنگ منسوخ کر کے اصل واؤچر کے مطابق دوبارہ بکنگ کی درخواست کرے گا۔
14۔ اگر ٹرین کی روانگی سے 4 گھنٹے قبل ٹکٹ جاری نہ کیا گیا تو پاکستان ریلوے بکنگ منسوخ کر دے گی۔ اس صورت میں کوئی رقم واپس نہیں کی جائے گی۔
15۔ موجودہ ریفنڈ پالیسی کے مطابق ٹرین کی روانگی سے 1 گھنٹہ 30 منٹ سے کم وقت رہ جانے پر کوئی منسوخی ممکن نہیں ہوگی۔
16۔ منسوخ شدہ ٹکٹ کا ای-واؤچر دوبارہ استعمال کے قابل نہیں ہوگا۔
یہ معیاری طریقہ کار چیف کمرشل منیجر کی منظوری سے جاری کیا جاتا ہے۔
