Styving
I april 2019 kom Steffen Neset i Alltech Norway til Rein Design AS med ideen om å lage ei landbruksmesse for Vestland.
I løpet av sommaren og hausten 2019 vart det gjort eit arbeid med å samle ein partnerskap som er sterk nok til å løfte det som blir eit storarrangement.
Til lanseringa av arrangementet på Mo 27.november 2019 står følgande partar bak som sponsorar, samarbeidspartar, og med personresursar til ei resursgruppe for arrangementet:
Sogn og Fjordane Bondelag
Sogn og Fjordane Bonde- og Småbrukarlag
Alltech Norway AS
Sparebanken Sogn og Fjordane
Tine
Nortura
Mo og Øyrane vgs
Enivest
Berge og Co AS
Rein Design AS
Sunnfjord Utvikling AS
Førde Industri og Næringssamskipnad
Fjøssystemer
Førde Skogeigarlag
Fjordtømmer AS
Norsk Landbruksrådgiving Vest SA er positive til arrangementet og vil delta på ulike måtar, spesielt opp mot rekruttering til næringa.
Felleskjøpet vert med som utstillar, og stiller med ein person i resursgruppa for arrangementet.
Det har også vore god kontakt med Fylkesmann Vestland landbruk, Vestland fylkeskommune og Innovasjon Norge, som alle ser med interesse på korleis messa kan vere eit utviklingstiltak for landbruket.
Sunnfjord har ei lang og god historie for landbruksmesser og fesjå, der den første hesteutstillinga på Vestlandet vart arrangert i Førde i 1864. 100 år seinare, i 1964, gjekk den store landsutstillinga av stabelen, som ein del av 100 års jubileet. Fleire andre plassar i Noreg blir det arrangert store landbruksmesser, og no er det på tide at Vestland tar sin plass på kartet! Landbruket i Sogn og Fjordane tek difor initiativ til ei stor, publikumsretta landbruksmesse for nye Vestland.
Namnet på messa, Styving, er, ifølge Wikipedia, eit norsk jordbruksuttrykk, både verb og substantiv, som stammar frå småbruk på Vestlandet, der vinterfôret til sau og geit blei supplert med greiner av lauvtre.
Det finns område med styvingstre som har blitt restaurert, og vert haldne vedlike som viktige kulturminne, slik som i Kusslia, 2 km vest for Mo i Førde. Den mest kjende styvingen er kanskje Nikolai Astrups «Seljekallen», det kjende måleriet.
Symbolikken er mangslungen:
Det er ikkje mindre aktuelt enn før å ta vare på og nytte resursane, jmf. matsvinn, debatten om overskot av sauekjøt og kasting av alt frå skeive gulrøtter, til potet og plomme.
Den solide, gamle stammen knyter oss til fortida, den gong bonden var ei sterk samfunnsberande kraft. Mange av verdiane frå det gamle bondesamfunnet er verd å bli tekne med vidare.
Tallause friske skot gjev håp for framtida med, teknologisk utvikling, ny kunnskap, mangfald i driftsmåtar og storleik, lokalmat, inn på tunet osv. Men dei friske skota kan og symbolisere ringverknadar av landbruk i form av foredlingsindustri, leverandørindustri og andre tilknytte næringar. Det kan symbolisere tusenvis av bønder på store og små bruk over heile landet, eller transport, opplæring, forsking og utvikling.
