14/02/2026
Эмэгтэй жолоочийн сэтгэгдэл: 🥹 Энэ өвлийг анх удаа такси, хүргэлт хавсруулж хийж үзлээ.
Яах вэ, хавсруулаад өдөртөө 100к орчим бол хийчихдэг. Өнгөрсөн хагас сайнд зөвхөн таксигаар 228к хийж, магнай хагартлаа баярлаж үзлээ. Өөрийнхөө хувьд бол жинхэнэ рекорд шүү дээ.
Маргааш нь ойр зуурын өрөө дараад, машинаа бүтэн угаалгад оруулж гангарууллаа. Гэтэл угаалгаас гараад удалгүй урд талын бүх гэрэл асч, замын голд таг унтарчихав. Жаахан байж байгаад дахиад унтарна. Арга буюу арай чүү гэртээ харьж, аккумлятороо салгаад хучаад орхилоо. “Их идсэний маргааш өнж” гэдэг шиг л юм боллоо доо.
Маргааш нь машин маань зүгээр асахад бараг уйлах шахсан шүү 🥹
🥹 228к хийсэн өдрийн нэг түүх.
100к гаруй хийчихээд харих санаатай явж байтал Багшийн дээдээс нэгэн бүсгүй хүүтэйгээ “Чингисийн хүрээ орно” гээд суув. Би дотроо “андуурсан байлгүй дээ, хол газар шүү” гэж бодсон ч хөдөллөө.
Тэнд амралтад байгаа нөхөр дээрээ очно, очоод тосоод авна гэнэ. Зам баримжаа муутай би location-оо асаагаад явсаар хүргэж өглөө.
Замдаа ээж нь хүүдээ пүүз аваарай гээд 500–600к гэж ярьж явна. Буухдаа хүүдээ 300к шилжүүлээд “пүүзний мөнгө” гээд өглөө. Надаас “хэд гарсан бэ?” гэхээр нь 51,500₮ гэж хэлсэн чинь “хүүг маань авсан газарт нь буцаагаад хүргээд өгөөрэй” гээд 100к шууд шилжүүлчихлээ.
Хүүг нь буцаагаад хүргэж өгчихөөд би нэг хэсэг бодолд орсон.
Би дөрвөн хүүхдэдээ нийлүүлээд л 200к-д гутал авч өгдөг. Энэ өвөл хоёрт нь л шинэ гутал авч өгөөд, нөгөө хоёрыг нь хуучнаар нь өвөлжүүлсэн. Дотроо хүүхдүүдээ өрөвдөнө.
Гэртээ орохдоо хүүхдүүдийнхээ тоогоор зайрмаг бариад орлоо. “Хүмүүс яаж ингэж сайхан амьдраад байна аа? Би яаж амьдраад байна аа?” гэж битүүхэндээ өөрийгөө голсоор.
Гэтэл манай хэд зайрмаг хараад: — Баярлалаа, ээжээ ❤️
гээд л амтархан идэцгээв.
Тэгээд би өөртөө талархсан.
Хүнээс гуйгаагүй.
Өөрийнхөө хөдөлмөрөөр олсон.
Ганцаараа амьдралаа авч явж байна.
“Чи мундаг шүү” гэж өөртөө зориг оруулсан.
Copied
