09/01/2026
သွင်းကုန်လိုင်စင်အတွက် ကုမ္ပဏီတစ်ခုကို ကုန်ပစ္စည်းအမျိုးအစား တူညီပါက တစ်စောင်သာ ခွင့်ပြုပေးမည်
ရန်ကုန်၊ ဇန်နဝါရီ ၉
ပြည်တွင်းမှာ ရောင်းဝယ်ခြင်းလုပ်ငန်းတွေ ဆောင်ရွက်ဖို့ တင်သွင်းမှုများအတွက် လိုင်စင်လျှောက်ထားရာမှာ ကုမ္ပဏီတစ်ခုကို ကုန်ပစ္စည်းအမျိုးအစား တူညီပါက ပြက္ခဒိန်တစ်လအတွင်း တစ်စောင်သာ လျှောက်ထားကြဖို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန (MOC) ကနေ သိရပါတယ်။
ဇန်နဝါရီလ ၈ ရက်နေ့က ထုတ်ပြန်တဲ့ သွင်းကုန်လုပ်ငန်းရှင်တွေကို အသိပေးကြညာခြင်းမှာ အထက်ပါအတိုင်း ဖော်ပြထားပြီး အဆိုပါ သွင်းကုန်လိုင်စင်တစ်စောင်ကိုသာ အတည်ပြု ခွင့်ပြုပေးသွားမယ်လို့ ဆိုပါတယ်။
ကုန်သွယ်ရေးဦးစီးဌာနအနေနဲ့ သွင်းကုန်လုပ်ငန်းရှင်တွေကို ၂၀၂၆ ခုနှစ်၊ ဇန်နဝါရီလ ၁ ရက်နေ့မှ စတင်ပြီး လျှောက်ထားတဲ့ သွင်းကုန်လိုင်စင် / ပါမစ် လျှောက်လွှာတွေရဲ့ သက်တမ်းကို ရက်ပေါင်း ၁၈၀ သတ်မှတ်မယ်လို့ သိရပါတယ်။
သွင်းကုန်လိုင်စင် / ပါမစ် လျှောက်လွှာတွေရဲ့ သက်တမ်း ရက်ပေါင်း ၁၈၀ ကျော်လွန်တဲ့ လျှောက်ထားမှုတွေကို Myanmar Tradenet 2.0 စနစ်မှ ပယ်ဖျက်ခြင်း (Auto Cancel) ဆောင်ရွက်သွားမယ်လို့လည်း သိရပါတယ်။
ဒါ့ကြောင့် သွင်းကုန်လုပ်ငန်းရှင်တွေအနေနဲ့ သွင်းကုန်လိုင်စင် / ပါမစ် လျှောက်လွှာတွေနဲ့ စပ်လျဉ်းပြီး ထုတ်ပြန်ချက်တွေအတိုင်း သိရှိလိုက်နာဆောင်ရွက်နိုင်ဖို့လည်း အသိပေးထားပါတယ်။
ဒါ့အပြင် စီးပွား/ကူးသန်းအနေနဲ့ ပို့ကုန်လုပ်ငန်းတွေ အဆင်ပြေချောမွေ့စေရေးအတွက် ပို့ကုန်လိုင်စင်လျှောက်ထားမှုတွေကို အချက်အလက်ပြည့်စုံစွာ တင်ပြလာပါက Automatic Licensing စနစ်နဲ့ အလိုအလျောက်ခွင့်ပြုခြင်း၊ Non-Automatic Licensing စနစ်နဲ့ လျှောက်ထားမှုတွေကို ပို့ကုန်သွင်းကုန်လုပ်ငန်းညှိနှိုင်းမှုကော်မတီက စိစစ်ပြီး ရုံးဖွင့်ရက်တွေမှာ ၂၄ နာရီအတွင်း ခွင့်ပြုခြင်းတွေနဲ့ ဆောင်ရွက်ပေးနေတယ်လို့ သိရပါတယ်။
ဒါ့ကြောင့် ပို့ကုန်လုပ်ငန်းရှင်တွေအနေနဲ့ စောင်ရေနဲ့ ပမာဏအတိုင်း အပြည့်အဝ မှန်မှန်ကန်ကန် တင်ပို့ကြဖို့နဲ့ ပို့ကုန်ရငွေ ပြန်လည်ဝင်ရောက်မှုအပေါ် မြန်မာနိုင်ငံတော်ဗဟိုဘဏ်က သတ်မှတ်ထားတဲ့ ကာလအတွင်း အပြည့်အဝ ပြန်လည်ဝင်ရောက်နိုင်ရေး ကြိုးပမ်းဆောင်ရွက်ကြဖို့ တိုက်တွန်းထားပါတယ်။
သတင်း - BETV Business
