05/10/2021
တရုတ်နယ်စပ်တွင် ၆ လကြာ ပိတ်မိနေသော မြန်မာပိုင်ကုန်ပစ္စည်းများ သယ်ယူခွင့်ပြုမည်
October 5, 2021 by ဧရာဝတီ
တရုတ်နိုင်ငံ ကျယ်ဂေါင်ဘက်ခြမ်းရှိ ဂိုဒေါင်များတွင် ပြီးခဲ့သည့် ဧပြီလကတည်းက ပိတ်မိနေသည့် မြန်မာနိုင်ငံသားပိုင် သွင်းကုန်ပစ္စည်းများကို ယခုလအတွင်း သယ်ယူခွင့်ပြုသွားမည် ဖြစ်ကြောင်း ကုန်သည်များထံက သိရသည်။
ကုန်တွဲကား အစီး ၇၀၀ စာရှိသော ပိတ်မိနေသော ကုန်ပစ္စည်းများကို မကြာခင် တင်သွင်းခွင့်ပြုပေးမည် ဖြစ်သဖြင့် သက် ဆိုင်ရာ လုပ်ငန်းရှင်များ၊ ကုန်ဂိတ်များနှင့် ကားဆရာများအနေနှင့် အောက်ခြေအဆင့်နှင့် ကြိုတင်ညှိနှိုင်း ဆောင်ရွက်ထား နိုင်ရန် မူဆယ်- နမ့်ခမ်း နယ်စပ်ကုန်သွယ်ရေး ကုန်သည်များ အသင်းက ထုတ်ပြန်ထားသည်။
မူဆယ် ဆန်စပါး ကုန်စည်ဒိုင် ဒု ဥက္ကဋ္ဌ ဦးမင်းသိန်းက “အခုနှစ် ဧပြီလ ၁ ရက်မှာ ကျယ်ဂေါင်နဲ့ မန့်ဝိန်းပေါက်ကို ပိတ် လိုက်တယ်။ ကျယ်ဂေါင်ထဲမှာ မြန်မာနိုင်ငံသားတွေ ပိုင်ဆိုင်တဲ့ ကုန်ပစ္စည်းတွေက တွဲကားအစီး ၇၀၀ လောက်က အခု ထက်ထိ ထုတ်မရဘူး။ အခု ၆ လလောက်တောင် ရှိသွားပြီဆိုတော့ ဒီပစ္စည်းတွေ ထုတ်ပေးပါ့မယ်ပေါ့။ ဒါပေမယ့် မြန်မာ ပြည်ကနေ ကုန်မပါတဲ့ ခါလီကားတွေ လာရမယ်။ ကျယ်ဂေါင် ဂိုဒေါင်အသီးသီးမှာ ချထားတဲ့ ကုန်ပစ္စည်း တွေကို တင်မယ်။ ပြီးရင် မူဆယ်ထဲကို ပြန်ထွက်မယ်ပေါ့။ ဒါတွေပြီးရင်တော့ အဝင်ရော၊ အထွက်ရော မရဘူး” ဟု ဧရာ ဝတီသို့ ပြောသည်။
လက်ရှိတွင် ကျယ်ဂေါင်တွင် ပိတ်မိနေသည့် တွဲကားအစီး ၇၀၀ စာကုန်ပစ္စည်းများ အတွက်သာ တရုတ်ဘက်က မြန်မာ ဘက်သို့ တင်သွင်းခွင့်ပေးမည်ဖြစ်ပြီး နယ်စပ်ကုန်သွယ် ဂိတ်ပေါက်များကို ယခင်အတိုင်း ဆက်လက် ပိတ်ထားမည့် အခြေ အနေသာ ရှိနေသေးကြောင်း ၎င်းက ရှင်းပြသည်။
ဆက်လက်၍ ၎င်းက “အခုပိတ်နေတဲ့ကုန်တွေကို ဖွင့်ပေးမယ်ဆိုပေမယ့် ဘယ်နေ့ ဖွင့်ပေးမယ်ဆိုတာ မသိရသေးဘူး။ ဆွေးနွေးတာတော့ ပြီးပြီ။ ၄၊ ၅၊ ၆ ရက်ကနေ တပတ်လောက်အထိ ကြာရင် ဖွင့်ပေးမလားပေါ့။ ဒါပြီးတော့ နှစ်ဖက်စလုံးကို မန့်ဝိန်းဂိတ်က ပြန်ပိတ်မှာ ဖြစ်တယ်” ဟု ပြောသည်။
တရုတ်-မြန်မာ နယ်စပ်ကုန်သွယ်ရေး အခြေအနေမှာ ပြန်ဖွင့်ရန် မသေချာသေးသော်လည်း နှစ်နိုင်ငံနယ်စပ်တွင် ကိုဗစ်-၁၉ ကုသရေး စင်တာ တည်ဆောက်ပြီးစီးသွားပြီဖြစ်သောကြောင့် ကုန်သည်များအနေဖြင့် ကျင်စန်းကျော့ နယ်စပ်ဂိတ် ပေါက်ကို ကုန်သွယ်မှု ပြန်လည်ဖွင့်လှစ်ပေးရန် မျှော်လင့်နေကြသည်။
လတ်တလောတွင် မူဆယ်-နမ့်ခမ်း နယ်စပ်ကုန်သွယ်ရေး ကုန်သည်များအသင်းက ကျယ်ဂေါင်ရှိ ကုန်ပစ္စည်းများ သယ်ယူ ရန်အတွက် မြန်မာဘက်မှ ကုန်တင်ကားအလွတ်များကို ပြင်ဆင်ထားကြရန်နှင့် မူဆယ်ဘက်မှ ကျယ်ဂေါင်ဘက်သို့ တုံကင်စနစ်နှင့် ဝင်ရောက်ခွင့်ပေးမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
ကိုဗစ်ကြောင့် မူဆယ်- ကျယ်ဂေါင် ကုန်သွယ်ရေးဇုန်ကို တရုတ်နိုင်ငံဘက်က ပိတ်ထားတာ တစ်နှစ်ကျော်ရှိနေပြီဖြစ်ပြီး လက်ရှိတွင် တရုတ်က မြန်မာဘက်သို့ ကိုဗစ်နှင့် ဆက်စပ်သည့် ကျန်းမာရေးသုံးပစ္စည်းများကို အပတ်စဉ် တနင်္လာ၊ ဗုဒ္ဓဟူးနှင့် သောကြာနေ့များတွင် သွင်းခွင့် ပြုထားကာ ချင်းရွှေဟော် နယ်စပ်ကုန်သွယ်ရေးဘက်တွင် ကျန်မားရေးသုံး ပစ္စည်းများသာမက တရုတ်နိုင်ငံထွက် ပန်သီး၊ သစ်တော်သီး အစရှိသည့် စားကုန်သောက်ကုန်ပစ္စည်းများ မြန်မာဘက်သို့ တင်သွင်း နေသည်။
သို့သော် အောက်တိုဘာလ ၆ ရက်မှစ၍ ချင်းရွှေဟော် နယ်စပ်ကုန်သွယ်ရေး ဂိတ်ပေါက်ကိုလည်း တရုတ်ဘက်မှ တင် သွင်းမည့် ကုန်ပစ္စည်းများတွင် ကျန်းမာရေးသုံး ကုန်ပစ္စည်းမှလွဲ၍ အခြားကုန်စည်များကို မြန်မာဘက်သို့ အသွင်း မခံ တော့ကြောင်း စစ်ကောင်စီ လက်အောက်ခံ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက အောက်တိုဘာလ ၄ ရက် နေ့စွဲနှင့် ထုတ်ပြန်ထားသည်။
နယ်စပ်ကုန်သွယ်ရေး ရပ်ဆိုင်းနေသောကြောင့် တရုတ်ဘက်မှ တင်သွင်းသည့် သွင်းကုန်ပစ္စည်းများမှာ ၃၀ ရာခိုင်နှုန်း အထိ ဈေးမြင့်လာပြီး နယ်စပ်ဂိတ်ကို မှီခိုနေသည့် ကုန်သည်များ ခက်ခဲသလို ယာဉ်ပိုင်ရှင်များ၊ ကုန်ကားဆရာများ၊ ကုန်တင်ကုန်ချ အလုပ်သမားများအတွက် စားဝတ်နေရေးများ ခက်ခဲနေကြောင်း သိရသည်။
တရုတ်- မြန်မာ အဓိက ကုန်သွယ်ရေး ဂိတ်ဖြစ်သော မူဆယ် ၁၀၅ မိုင် တခုတည်း၏ ၁ ရက်တာ ကုန်သွယ်မှု ပမာဏသည် ပုံမှန်ကာလတွင် အမေရိကန်ဒေါ်လာ ၁၀ သန်းခန့် ရှိသည်။
Hj Thura - MDY
