26/02/2023
📌උතුර දකුණ යා කල ,
රජරට රැජිණට අවුරුදු 55යි.📌
ශ්රී ලංකා දුම්රිය සේවයේ පැරණිතම දුම්රියක් වගේම ප්රධාන දුම්රියක් ලෙස සැලකෙන රජරට රැජිණ සීග්රගාමී දුම්රිය අද දින සිය 55 වෙනි උපන්දිනය සමරණවා.එනම් මීට හරියටම වසර 55කට පෙරයි රජරට රැජිණ නමින් දුම්රියක් ධාවනයට එක් වන්නේ . ඉතින් අද ලිපියෙන් බලාපොරොත්තු වන්නේ වසර 55 ක් සපිරෙන රජරට රැජිණ දුම්රිය ගැන සඳහනක් ඔබ වෙත ගෙන ඒමටයි.
1968 වර්ෂයේ පෙබරවාරි මස 26 වැනි දින එනම් මීට වසර 55 කට පෙර අද වැනි දිනක තමයි උතුරත් දකුණත් යා කරමින් රජරට රැජිණ දුම්රිය ධාවනයට එක් වන්නෙ. 1965 වර්ෂයේ එවකට සිටි අග්රාමාත්යවරයාවූ ඩඩ්ලි සේනානායක මහතාගේ රජය සමයේ එවකට ප්රවාහන අමාත්යවරයාගේ සංකල්පයකට අනුව තමයි රජරට රැජිණ දුම්රිය ආරම්භ වන්නෙ.. මෙහි මංගල ගමන සිදු වන්නේ කොළඹ කොටුව සිට අනුරාධපුරය දක්වායි. කලක් යන තුරුම මෙය කොළඹ කොටුව සහ අනුරාධපුර අතර ධාවනය වූ අතර මගී ඉල්ලීම පරිදි මෙම දුම්රිය පසු කලෙක මාතර සිට වව්නියාව දක්වා ධාවනය කරවීමට දුම්රිය දෙපාර්තමේන්තුව පියවර ගනු ලැබුවා.
උතුරත් දකුණත් යා කරමින් උතුරේ සහ රජරට අයට අගනුවරට සහ දකුණටත් දකුණේ අයට අගනුවරට සහ රජරට ,උතුරටත් ගමන් පහසුව සැලසීමේ අරමුණක් විදියට තමයි රජරට රැජිණ දුම්රිය ධාවනයට එක් වන්නේ. මෙහි විශේෂතම හේතුවක් ලෙස රජරට ප්රදේශය වල මගීන්ට අගනුවර කරා ගමන් පහසුකම් සපයා ගැනීමට එවකට තිබූ පහසුම මාධ්ය උනේ දුම්රිය .නමුත් ඔවුන්ට එම ගමන් පහසුව සපයාගන්නට සිද්ධ උනේ යාපනය සහ තලේමන්නාරම් සිට පැමිණෙන දුම්රිය වලයි. එම දුම්රිය වල ඇතිවුන අධික මගී තදබදයත් මෙම රජරට රැජිණ දුම්රිය යෙදවීමට සඳහා බලපෑ විශේෂිතම හේතුවක් වුනා. එවකට රජරට රැජිණ දුම්රිය ධාවනය වීමේදි රජරට රැජිණ දුම්රියට සමගාමීව දුම්රිය නවත්වන සෑම දුම්රිය ස්ථානයක් කරාම දුම්රිය සේවය සහ ලංගම ඒකාබද්ධ බස් සේවාවක් ක්රීයාත්මක කිරීමද විශේෂත්වයක්.
එවකට රජරට රැජිණ අනුරාධපුර සිට ගමන් ආරම්භ කර ඇත්තේ අලුයම 5:55ට එය උදෑසන 10 පමණ වන විට කොළඹ කොටුවට ළගා වී තිබෙනවා. 1970 පමණ වන විට මෙම දුම්රිය කොළඹ කොටුව සිට අනුරාධපුර ගමනාන්තය වව්නියාව දක්වා දීර්ඝ වූ අතර 90 දශකයේ මුල් භාගය වන විට මෙය වව්නියාව සහ මාතර අතර ධාවනය කරවීමට දුම්රිය දෙපාර්තමේන්තුව පියවර ගනු ලැබුවා.
එවකට දුම්රිය අංක 47 සහ 48 විදියට තමයි රජරට රැජිණ දුම්රිය හඳුන්වනු ලැබුවේ මාතර සහ වව්නියාව අතර ධාවනය වූ රජරට රැජිණ දුම්රිය වර්තමානය වන විට ලංකාවේ වැඩිම දුරක් ධාවනය වන දුම්රියක් ලෙස බෙලිඅත්ත සහ වව්නියාව අතර ධාවනය වීම විශේෂත්වයක් , පසුව මේ වන විට එය ධාවනය වන්නෙ බෙලිඅත්ත සහ අනුරාධපුර අතරයි. වර්තමානයේ වන විට තන්ත්රී සමාගම විසින් නවීකරණය කරන ලග රුමේනියන් මැදිරි කට්ටල දෙකකින් දෛනිකව ඉහළ පහළ දුම්රිය දෙකක් විදියට අනුරාධපුර සිට බෙලිඅත්තටත්, බෙලිඅත්ත සිට අනුරාධපුර දක්වාත් රජරට රැජිණ දුම්රිය ධාවනය වනවා.
බෙලිඅත්තෙන් දුම්රිය අංක 85 විදියට උදෑසන 8:45ටත් කොළඹ කොටුවෙන් පස්වරු 1:15ටත් රජරට රැජිණ දුම්රිය අනුරාධපුර බලා පිටත් වේ.
අනුරාධපුරින් අලුයම 5.00ට දුම්රිය අංක 86 විදියට මාතර සහ බෙලිඅත්ත බලා රජරට රැජිණ දුම්රිය ගමන් ආරම්භ කරනවා.
දිර්ඝ ගමනාන්තයක් සහිත දුම්රියක් වුවත් වර්තමානයේ තාමත් රජරට රැජිණ දුම්රියේ ඇති පහසුකම් සහ සුවපහසු බව පිළිබදව නම් සෑහීමකට පත් විය නොහැකි තත්ත්වයක පවතී තෙවනි පන්තියේ සහ දෙවනි පන්තියේ මැදිරි වලින් පමණක් සමන්විත රජරට රැජිණ දුම්රිය කලක් M2 සහ M6 පන්තියේ දුම්රිය එන්ජින් මගින් ධාවනය වූ අතර වර්තමානය වන විට එය මරදාන ELS දුම්රිය ධාවනාගාරය යටතේ M4/M5 හෝ M8/M10 දුම්රිය එන්ජින් මගින් ධාවනය වේ.
ඉතින් අද දිනට වසර 55ක් සපිරෙන රජරට රැජිණ සීග්රගාමී දුම්රියට සුභ උපන්දිනයක් සහ තවත් චිරාත් කාලයක් දුම්රිය සේවය තුළ වැජඹෙන්නට සුභ පැතුම් එක් කරන ගමන් මෙම දුම්රිය තවත් මගීන් හට සුව පහසුව සහ ඉක්මනින් ගමනාන්ත කරා ළගාවීමට හැකි අයුරින් කටයුතු සකස් කිරීමට දුම්රිය දෙපාර්තමේන්තුවට හැකිවේවාද කියා ප්රාර්ථනා කරමි.
සටහන සහ ජායාරූප : ශශින් විජේතුංග
