13/03/2026
Теміржол кәсіпорындарының қызметінде қыс мезгілі дәстүрлі түрде ерекше жұмыс кезеңі саналады. Себебі төмен температура, қалың қар мен боран инфрақұрылымның жағдайына, техниканың жұмысына, қауіпсіздікке және тасымалдау үдерістерінің тұрақтылығына айтарлықтай әсер етеді. Мұндай жағдайда қызметкерлер мен жабдықтарға түсетін жүктеме артып, барлық қызметтердің жұмысына қойылатын сенімділік пен жеделдік талаптары күшейеді.
Осы кезеңдегі маңызды шаралардың бірі — қармен күрес жұмыстары. Бұл қыс мезгілінде пойыз қозғалысының үздіксіз әрі қауіпсіз жүруін қамтамасыз етуге бағытталған теміржол көлігі кәсіпорындары мен қызметтерінің келісілген іс-қимылдарының кешені.
Қар қалың түскен кезде теміржол саласының барлық кәсіпорындары мен қызметтері біртұтас жүйе ретінде әрекет етіп, жолдарды, бағыттамаларды, станциялық парктерді және инфрақұрылымның басқа да элементтерін қар мен мұздан тазарту жұмыстарын ұйымдастырады. Негізгі мақсат — мүмкіндігінше қысқа мерзімде тасымалдау үдерісінің үздіксіздігін қалпына келтіру және қар мен боран салдарынан пойыздардың кешігуіне жол бермеу.
Соңғы екі аптада еліміздің солтүстік өңірлерінде ауа райы күрт нашарлап, қалың қар мен боран теміржол кәсіпорындарының тұрақты жұмысына қауіп төндірді. Осыған байланысты біздің компанияның бөлімшелері қармен күрес жұмыстарына белсенді түрде қатысып, локомотивтер тұратын жолдарды, бағыттамаларды және тартым жолдарын қардан тазарту үшін қосымша қызметкерлер жұмылдырды.
Сонымен қатар, Астана және Тобыл станцияларында әріптестерімізге — «Қамқор Локомотив» жөндеу кәсіпорнына және «ҚТЖ – Жүк тасымалы» ЖШС-нің ПТО бөлімшесіне қар тазалау жұмыстарына көмек көрсетілді.
