12/12/2025
ក្រុមហ៊ុនចំនួន ៦ ចុះអនុស្សរណៈយោគយល់គ្នា បង្កើតសម្ព័ន្ធភាពយុទ្ធសាស្ត្រដើម្បីការអភិវឌ្ឍធនធានមនុស្ស និងនិរន្តរភាពធុរកិច្ច
ក្រុមហ៊ុនឈានមុខគេចំនួន ៦ បានប្រារព្ធពិធីចុះហត្ថលេខាជាផ្លូវការលើអនុស្សរណៈនៃការយោគយល់គ្នាដ៏សំខាន់មួយនៅថ្ងៃនេះ ដើម្បីបង្កើតជាសម្ព័ន្ធភាពយុទ្ធសាស្ត្រដើម្បីការអភិវឌ្ឍ និងនិរន្តរភាព។ កិច្ចសហការនេះមានគោលបំណងចម្បងក្នុងការអភិវឌ្ឍធនធានមនុស្សប្រកបដោយគុណភាពខ្ពស់ ព្រមទាំងរួមចំណែកដល់ការលើកកម្ពស់និរន្តរភាពធុរកិច្ច បង្កើនឱកាសការងារ មុខរបរសមរម្យ ស្ថិរភាពចំណូល និងសមត្ថភាពប្រកួតប្រជែងរបស់ប្រជាជនកម្ពុជា។ ក្រុមហ៊ុនភាគីហត្ថលេខីរួមមាន ក្រុមហ៊ុនវេសឡាញ អេឌ្យូខេសិន គ្រុបតំណាងដោយឧកញ៉ា ប៉ិច បូឡែន; ក្រុមហ៊ុន GGear Group Co., Ltd តំណាងដោយឧកញ៉ា សុខ ពិសិដ្ឋ; ក្រុមហ៊ុនAGL (Cambodia) Co., Ltd. តំណាងដោយឧកញ៉ា គួច ផេង; ក្រុមហ៊ុន Aplus Consulting Co., Ltd. តំណាងដោយ ឧកញ៉ា ស គីណាល់; ក្រុមហ៊ុន 121 Shoppe Co., Ltd. តំណាងដោយឧកញ៉ា កែវ សុខា; និងក្រុមហ៊ុន APV (Cambodia) Co., Ltd. តំណាងដោយលោក ចាន់ វាសនា។
ក្រៅពីការបង្ហាញចក្ខុវិស័យនិងគុណតម្លៃក្រហ៊ុនខ្លួន ថ្នាក់ដឹកនាំនៃក្រុមហ៊ុនទាំង ៦ បានសម្តែងនូវចំណាប់អារម្មណ៍ និងការប្តេជ្ញាចិត្តខ្ពស់ចំពោះសម្ព័ន្ធភាពនេ។ ឧកញ៉ា ប៉ិច បូឡែន បានបញ្ជាក់ថា សម្ព័ន្ធភាពជាយុទ្ធសាស្ត្រនេះត្រូវបានបង្កើតឡើងដើម្បីពង្រឹងទំនាក់ទំនងរវាងគណៈគ្រប់គ្រង និងបុគ្គលិកជំនាញឱ្យកាន់តែប្រសើរ លឿន និងរហ័ស លើសពីទំនាក់ទំនងជាបងប្អូនដែលធ្លាប់មានស្រាប់។
ឧកញ៉ា គួច ផេង ក៏បានសង្កត់ធ្ងន់ថា គន្លឹះសំខាន់នៃកិច្ចសហការនេះគឺ "ការបើកចិត្ត" ដែលអនុញ្ញាតឱ្យមានការចែករំលែកធនធាន ដើម្បីពង្រីកសកម្មភាពទំនួលខុសត្រូវសង្គម (CSR) ឱ្យបានកាន់តែធំ និងមានផលវិជ្ជមានកាន់តែប្រសើរដល់សង្គម។
ចំណែកឯ ឧកញ៉ា ស គីណាល់ បានបញ្ជាក់ទិសដៅអនុស្សារណៈនេះបន្ថែមថា បន្ថែមលើរឿងសង្គមនិងកិច្ចការសហគមន៍ដែលយើងធ្លាប់បានធ្វើរួមគ្នាច្រើនមកហើយ អនុស្សារៈក្នុងថ្ងៃនេះ ជាជំហានថ្មីមួយទៀត ក្នុងការគាំទ្រក្រុមហ៊ុនគ្នាទៅវិញទៅមក ដើម្បីពង្រឹងប្រតិបត្តការក្រុមហ៊ុនយើង និងជួយដល់សង្គមជាតិយើងកាន់តែរឹងមាំ និងខ្លាំងជាងមុនបន្ថែមទៀត។
រីឯ ឧកញ៉ា សុខ ពិសិដ្ឋ បានរំលេចពីអត្ថប្រយោជន៍បន្ថែមថា សម្ព័ន្ធភាពនេះជាយន្តការមួយដែលជួយគាំទ្រនិងពង្រឹងសមត្ថភាពដល់គណៈគ្រប់គ្រង និងបុគ្គលិកជំនាញរបស់ក្រុមហ៊ុនទាំងអស់ ឱ្យអាចរៀនសូត្រពីគ្នា ស្គាល់គ្នាបានស៊ីជម្រៅ និងយល់ពីគ្នា។ គាត់ក៏រំពឹងទុកថា ក្រោយពីការបណ្តុះបណ្តាលរួមគ្នា បុគ្គលិកនឹងមានសមត្ថភាព និងធ្វើការប្រកបដោយវិជ្ជាជីវៈ (Professional) និងគោរពតាមគោលការណ៍ក្របខណ្ឌគតិយុទ្ធនានាបានកាន់តែប្រសើរជាងមុន។
ជារួមការចុះអនុស្សរណៈនៃការយោគយល់គ្នានេះ គឺផ្តើមចេញពីទំនាក់ទំនងដ៏ជិតស្និទ្ធនៃថ្នាក់ដឹកនាំរបស់ក្រុមហ៊ុនទាំង ៦ ដែលបានបោះជំហានដ៏សំខាន់មួយទៀតក្នុងការប្តេជ្ញាចិត្តរួមគ្នា ក្នុងការវិនិយោគ និងអភិវឌ្ឍធនធានមនុស្ស។ កិច្ចសហការនេះត្រូវបានរំពឹងទុកថានឹងបង្កើតបាននូវកម្លាំងពលកម្មមួយដែលមានសមត្ថភាពខ្ពស់ អាចឆ្លើយតបទៅនឹងតម្រូវការទីផ្សារការងារក្នុងតំបន់ និងសកលលោក ព្រមទាំងធានានូវភាពរឹងមាំ និងភាពរីកចម្រើនរបស់ក្រុមហ៊ុនដៃគូទាំងអស់។
📆 ថ្ងៃទី១២ ខែធ្នូ ឆ្នាំ២០២៥
📍 រាជធានីភ្នំពេញ
#អនុស្សរណៈយោគយល់ #សម្ព័ន្ធភាពយុទ្ធសាស្ត្រ #អភិវឌ្ឍធនធានមនុស្ស
#និរន្តរភាពធុរកិច្ច #កិច្ចសហការក្រុមហ៊ុន #ការលើកកម្ពស់ធនធានមនុស្ស #អភិវឌ្ឍសង្គម #សហការយុទ្ធសាស្ត្រ
