13/07/2015
ചരിത്രം ഭാഗം 1
ഹിജ്റ കലണ്ടര് എന്നറിയപ്പെടുന്ന ഇസ് ലാമിക് കലണ്ടര് 354-355 ദിവസങ്ങള് ചേര്ന്ന 12 മാസ കലണ്ടറാണ്. പൂര്ണമായും ചന്ദ്രന്റെ വൃദ്ധിക്ഷയങ്ങളുമായി ബന്ധപ്പെട്ടതായതുകൊണ്ട് കാലാവസ്ഥയുമായി ഇതിന് ബന്ധമൊന്നുമില്ല. ഇസ് ലാമിലെ ആഘോഷങ്ങളെല്ലാം ഈ കലണ്ടറിനെ അടിസ്ഥാനപ്പെടുത്തിയാണ് തീരുമാനിക്കുന്നത്. ഇസ് ലാമിലെ ആദ്യത്തെ കലണ്ടര് ആരംഭിക്കുന്നത് AD 622ലാണ്. പ്രവാചകന് മുഹമ്മദ് നബിയുടെ മദീനയിലേക്കുള്ള പലായനവുമായി ബന്ധപ്പെട്ടാണ് പ്രസ്തുത കലണ്ടറിന്റെ കാലഗണന അടിസ്ഥാനപ്പെടുത്തിയിട്ടുള്ളത്.
മുഹര്റം,സ്വഫര്,റബീഉല് അവ്വല്,റബീഉല് ആഖിര്,ജമാദല് ഊലാ, ജമാദല് ആഖിര്, റജബ്, ശഅ്ബാന്, റമദാന്, ദുല്ഖഅ്ദഃ, ദുല്ഹിജ്ജഃ എന്നിങ്ങനെയാണ് 12 മാസങ്ങള്. മുഹര്റം, ശഅ്ബാന്, ദുല്ഖഅ്ദഃ, ദുല്ഹിജ്ജഃ തുടങ്ങിയവ യുദ്ധം വിലക്കപ്പെട്ട പവിത്രമാസങ്ങളാണ്.
പ്രാഗ് -ഇസ് ലാമിക് കലണ്ടര്:
ലഭ്യമായതില് ഏറ്റവും പഴക്കമേറിയ ദക്ഷിണറേബ്യന് കലണ്ടറുകള് പരിശോധിക്കുമ്പോള് മനസിലാകുന്നത് അക്കാലത്ത് ഒട്ടേറെ പ്രാദേശിക കലണ്ടറുകള് നിലവിലുണ്ടായിരുന്നുവെന്നാണ്. മുസ് ലിംകള് ഉപയോഗിച്ചിരുന്ന മാസങ്ങളുടെ പേരുകള് പ്രാഗ് ഇസ് ലാമിക കലണ്ടറുകളിലും കാണപ്പെട്ടിരുന്നുവെന്നാണ് ചരിത്രകാരനായ അല്ബിറൂനിയും അല്മസ്ഊദിയും പ്രസ്താവിക്കുന്നത്. ഹിജാസ് കേന്ദ്രീകരിച്ച് അറബുഗോത്രങ്ങള് യുദ്ധം വിലക്കപ്പെട്ട പവിത്രമാസങ്ങളും അനുവദനീയമാസങ്ങളും തങ്ങളുടെ സൗകര്യത്തിനനുസരിച്ച് പരസ്പരം മാറ്റിമറിച്ചുപയോഗിച്ചിരുന്നതായി ചരിത്രത്തില് കാണാം.യുദ്ധത്തിനുവേണ്ടി കിനാനഃ ഗോത്രം അപ്രകാരം ചെയ്തിരുന്നു.
മാസങ്ങളെ അങ്ങോട്ടുമിങ്ങോട്ടും മാറ്റിക്കണക്കാക്കുന്ന(നസീഅ്) രീതിയെപ്പറ്റി പല വ്യാഖ്യാനങ്ങളുമുണ്ട്. ആധുനികഇസ് ലാമിക കലണ്ടറും മധ്യഅറേബ്യയിലെ ബിംബാരാധകരായ അറബികളുപയോഗിച്ചുകൊണ്ടിരുന്ന കലണ്ടറും ചാന്ദ്രമാസത്തെ അടിസ്ഥാനപ്പെടുത്തിയുള്ളതായിരുന്നുവെന്ന് മുസ് ലിം -പാശ്ചാത്യപണ്ഡിതന്മാര് അഭിപ്രായപ്പെടുന്നു. പവിത്രമാസങ്ങളെ തങ്ങളിഷ്ടപ്പെടുന്ന രീതിയില് കണക്കാക്കിയിരുന്നത് മക്കാമുശ് രിക്കുകളായിരുന്നു. ഇബ്നുഹിശാം, ഇബ്നുമന്സൂര് തുടങ്ങിയവരൊക്കെ ഈ അഭിപ്രായമുള്ളവരാണ്. 'സാബിഉ'കളുടെ ലിഖിതങ്ങള് പരിശോധിച്ചപ്പോള് യുദ്ധത്തിനുവേണ്ടി മാസത്തെ മാറ്റി മറ്റൊരുമാസത്തെ പകരം വെച്ചതായി കണ്ടെത്തിയിട്ടുണ്ട്. ഉദാഹരണത്തിന് രണ്ടാം വര്ഷത്തില് രണ്ട് ഹജ്ജുമാസങ്ങള് കണക്കാക്കിക്കൊണ്ട് തങ്ങളുടെ ഭൗതികകാര്യങ്ങള് അവര് നിര്വഹിക്കും. അബൂമശ്അറിന്റെ വീക്ഷണത്തില് അറബികള് ഇത് ജൂതന്മാരില്നിന്ന് പകര്ത്തിയതാണിതെന്നാണ്. എന്നാല് ഇസ് ലാം എല്ലാതരത്തിലുള്ള 'നസീഉ'കളും നിരോധിച്ചിരിക്കുന്നു. അല്ലാഹു നിര്ണയിച്ചുതന്ന ദിവസങ്ങള്ക്കും മാസങ്ങള്ക്കും അതിന്റെതായ പവിത്രതയും പ്രാധാന്യവുമുണ്ട്. അതിനെ ഓരോ വ്യക്തിയും സമൂഹവും മാറ്റിമറിക്കുന്നത് ദൈവനിഷേധമാണെന്നാണ് ഇസ് ലാമിന്റെ കാഴ്ചപ്പാട്.
AD 638(ഹി:17)ല് ഖലീഫഉമറിന്റെ ബസ്വറയിലെ ഗവര്ണറായിരുന്ന അബൂമൂസല്അശ്അരി തനിക്ക് കിട്ടുന്ന ഉത്തരവുകളില് തീയ്യതി പോലുള്ള എന്തെങ്കിലുമൊന്നിന്റെ അഭാവം കാര്യങ്ങളുടെ മുന്ഗണനാക്രമം നിശ്ചയിക്കുന്നതില് പ്രയാസമുണ്ടാക്കുന്നുവെന്ന് അറിയിച്ചു. തന്റെ അനുയായികളുമായി ആലോചിച്ചതിന്റെ അടിസ്ഥാനത്തില് നബിയുടെ മദീനാപ്രവേശത്തെ വര്ഷാരംഭമായികണക്കാക്കി. അക്കാലത്ത് അറബികള് പിന്തുടര്ന്നിരുന്നതുപോലെ മുഹര്റം ആദ്യമാസമായി സ്വീകരിച്ചു. അങ്ങനെ നബിയുടെ ഹിജ്റയുമായി ബന്ധപ്പെട്ട കാലഗണന പരിഗണിച്ചപ്പോള് അതിന് ഹിജ്റ കലണ്ടര് എന്ന പേരുസിദ്ധിച്ചു. അതനുസരിച്ച് ഹിജ് റ ഒന്നാംവര്ഷം മുഹര്റം1 വെള്ളിയാഴ്ചയാണ്. ജൂലിയന് കലണ്ടര്പ്രകാരം അത് AD 622 ജൂലൈ 16 ആണ്.
