11/10/2026
🔴 一場波，一肚氣，但聽日都係要抬起頭繼續面對不公而行
利物浦 對 曼城呢場大戰，最後喺一片爭議聲中結束。
其實由入場之前已經感受到，今日 Anfield 同平時有啲唔同。
場外周圍都見到 「CHEATS」，場內由開波開始噓聲、歌聲一浪接一浪。曼城財務案嘅陰霾擺到明籠罩住成場波，成個氣氛真係顛到震。
但我今日喺現場最大感受，反而係 球迷同球隊好似企咗喺同一條線上。可以講，Anfield 的確好耐好耐無試過咁有氣氛，大家咁齊心咁去撐對波。
大家都渴望贏呢場波，球迷亦由頭到尾積極為球隊打氣。就算場上踢得唔順，Anfield 都一直推住班球員向前。
講返場波本身，利物浦仍然喺進攻同防守都有唔少瑕疵，幾次處理亦做得唔夠好。
但下半場出嚟之後，利物浦有一段時間的確撳住曼城嚟砌，連續三番四次製造到黃金機會，只係自己把握唔到。
以當時個勢同創造出嚟嘅機會，根本係有機會領先咗先。
Anfield 嗰刻亦愈嚟愈起哄，球迷完全感受到個入波係有機會嚟緊。
偏偏就喺呢個階段，出現咗第二張黃牌，兩黃一紅，成場波嘅形勢亦隨之完全改變。球證又再主宰場賽事，強權在此企喺富人一方，令到本來一場精彩緊湊嘅賽事，變城一場不值一提嘅劇本。
但當一場原本拉鋸緊、甚至開始起勢、有機會領先嘅比賽，因為一兩個具爭議性嘅判決完全改變走勢，入場睇住成件事發生嘅球迷，真係好難唔火滾。
更加諷刺嘅係，場外大家一直高舉「CHEATS」。
但亦正正因為咁，先令人忍唔住去諗：
呢個世界，係咪真係「誰大、誰惡、誰正確」？
但無論現實世界定足球世界，有錢、有資源、有能力請最好嘅律師同專家，的確有更多方法去保護自己、爭取更好嘅結果。
人如此，球會亦如此。公平從來都唔係必然。
有時分別只係，我哋對「不公平」嘅接受程度，究竟可以去到幾遠。
今日輸咗，嬲就一定嬲。
入場睇住咁樣輸，更加L火。
但呢個世界，不公常在。
聽日都係要抬起頭，重新嚟過。🔴
YNWA
