16/09/2026
【⏳土家生活墟度光陰｜無用技能傳授／共學回顧】
謝謝今次所有幫手們、檔主們、師兄們，以及有嚟到嘅朋友想同我哋一齊虛度光陰❣️
今次土墟其中一個重點環節，就係邀請大家一齊學啲——冇乜用嘅技能💩
本身諗住係一個人教、一班人學，點知最後成件事逐漸失控。
由一開始「我想學識呢樣嘢」，慢慢變成「你試吓咁樣先」、「喂你又試多次」、「等我再試一次」，最後甚至發展成圍圈表演、心得交流，或者一班人一齊練到成間舖都響晒🪈。
👄 吹口哨
首先係吹口哨。
意外發現有位路過嘅日本師兄，原來係一位無用技能高手。
師兄話，吹口哨嘅重點係頂起條脷，製造兩個空間，令氣流得返小小位噴出……
不過小編仍未能掌握
但呢位師兄能力實在太出眾，平時甚至會趁等紅綠燈嘅時候練無用技能，仲私人醒多咗幾招俾我哋：
— 大拇指同中指捏緊，放鬆食指，再靠擺動前臂嘅慣性，令食指鞭打發聲
— 連續撻無名指同食指
最後大家有冇學識吹口哨唔重要，最重要係知道原來等紅綠燈都可以用嚟虛度光陰。
🗣️ 五邑話
另一位師兄分享得非常「有用」。
有用到我哋聽到一半已經想趕佢走。
因為佢竟然夠膽教我哋——五邑有邊五邑，除咗五邑、四邑，同香港之間嘅歷史關係添～
師兄最後終於教咗啲真正冇用嘅：
「你」、「我」、「他」，以及「你們」、「我們」、「他們」。
等我哋至少可以分清楚——
啲台山人鬧緊邊個。
🧳 黑子的遊客
Turns out，埋班嘅師弟妹原來都有好多旅行法寶。
本來只係諗住分享吓旅行相關嘅嘢，最後唔知點解變咗——
旅行好物心得交流會。
有人講自己旅行必備嘅物品，有人分享實用小袋，大家你一言我一語，逐漸變成一場旅行用品大會。
原來每個人都總有一啲：
「平時冇乜人會問，但旅行一定帶過」嘅冇用東西。
🥢 筷子斬亂麵
活動前，我哋準備咗一大碗麵，同幾款早餐脆脆。
一開始大家先表演各自揸筷子嘅方法，再解釋點解自己會咁樣揸。
之後有人開始認真練習「傳統」揸筷子嘅方法，順便夾吓早餐脆脆。
其他人就開始研究另一件事：
用筷子剪斷啲麵。
剪吓剪吓，大家突然發現——
成碗麵已經冇一條係完整。🤣🤣
最後有一位檔主太肚餓就食晒。
但過程中亦都有人越級挑戰，嘗試夾爆啲早餐脆脆。人類嘅慾望就係咁無窮無盡。
🏸 撩羽毛球
一開始大家都係跟 YouTube 老師學。
點知突然有位從木檔主🌟師兄出現，指點迷津。
原來重點係——
一氣呵成，好似潷飯咁，撩起個波。
於是成班人開始不停撩。
撩唔起都還好，
最尷尬係撩得起但接唔實，
然後粒波就飛去隔離。🤣
場面一度相當荒謬。
🎶 手笛
手笛嘅教學就小複雜：
一隻手 R 字、一隻手 C 字；
兩隻手手指公第一節關節位對齊；
兩隻手包實；
上唇放喺手指公關節位上面，
下唇放喺下面，
然後——吹。
如果吹唔響，唔好郁個頭。
只需要郁對手，由上至下慢慢搵一個吹得響嘅位。
於是當日由舖尾到門面，都有人喺度：
吹吓、郁吓、再吹吓。
Btw 大家可以follow 𝐇𝐚𝐧𝐝𝐟𝐥𝐮𝐭𝐞 𝐀𝐬𝐬𝐨𝐜𝐢𝐚𝐭𝐢𝐨𝐧,睇吓喺香港努力將手笛喺香港發揚光大。
👟 一隻手綁鞋帶
其實呢個技能，一開始大家已經知道係無用。
因為——綁唔得緊。
但大家仍然非常認真咁跟住 YouTube 老師學咗 15 分鐘。
有人成功，有人失敗。
然後唔知幾時開始，大家由各自練習，變成圍咗一個圈，逐個人表演一次自己點樣用一隻手綁鞋帶。
原來連蝴蝶結都有分傳統方法同異端。
如果你綁完個蝴蝶結係打直嘅——
九成都唔係傳統方法，甚至會俾人話係錯。😞
🪑 扮枱
今次比較可惜，大師兄未能現身。
但佢嘅意志明顯已經被傳承。
喺一個鐘頭入面，間中總會有人突然開始——
扮枱。😂
最奇怪係，大家又真係扮得幾似。
💧 試水會
講咗好耐嘅試水會，終於找數。
仲要特登由台灣托咗差唔多十支水返嚟。
不過正式試台灣水之前，我哋先用香港買到嘅水試吓自己嘅味蕾，認識吓礦泉水、蒸餾水、礦物質水之間嘅分別，以及唔同水質點樣影響味覺。
試水過程只能夠用四個字形容：
荒謬至極。
差啲以為要制水。
大家排晒隊，逐個拎住杯水試飲。
一個原本好似幾專業嘅活動，最後變成一班人認真飲水。
🏀 「揼你吖嗱！」
多謝師兄特登拎埋波同泵嚟，令我哋全日終於可以玩埋轉波。
呢招嘅精髓係將粒波喺手肘附近玩弄，先扮向前掉，增加「揼你吖嗱！」嘅震懾力，再用手控制粒波回轉返到手肘。
侮辱成分相當之高。
🖐️ 轉波
至於轉波……
除咗師兄遲到之外，
其實都冇乜嘢可以講。
唯一想強調嘅係：
手腕要識轉埋。
其實玩完一輪，我哋先發現，今次最有趣嘅可能唔係「學識咗幾多技能」。
而係大家由一開始完全做唔到，慢慢練到有少少似樣；見到隔離嗰個不停練，自己又忍唔住跟住練埋一份。
本來只係想學單手綁鞋帶，
最後變咗圍圈逐個人表演。
本來只係想試水，
最後變咗一班人好似排隊漱口咁認真飲水。
本來只係想學扮枱，
最後大家竟然會一齊鞭策對方——
成為一張更加似模似樣嘅枱。
呢啲時刻，其實都幾難得。
平時學一樣嘢，總係好自然咁問：
「學嚟有咩用？」
但嗰日大家好似暫時唔需要回答呢條問題。
就算完全唔識，都可以試吓；
失敗咗，再試多次；
見到人哋做到，自己又想試；
慢慢有少少成功，就忍唔住教埋隔離嗰個。
就好似細個第一次學一種新語言，
最先想學
