26/12/2021
التعاقد او البيع انوع منها CIF .
ماهو البيع سيف او التعاقد CIF ؟؟
كنت بتكلم مع صديق في مجال الشحن عن شروط التجارة الدولية او الانكوتيرمز ، و كنا بنتكلم عن مميزات وعيوب عقد البيع سيف ، فحبيت انى اشارككم المناقشة ، عسى انها تكون فيها افادة ولو بسيطة .
**** بدأنا الكلام عن البدايات لظهور الشرط من الناحية التاريخية :
- التعاقد سيف ظهر بقوة في فرنسا بعد حرب 1870 ، وانتشر بكثرة جدا فى نواحي اوروبا ابتداءا من 1914 ، لدرجة ان الامريكان فرضوه عشان مايتحملوش مخاطر الطريق اثناء رحلة السفينة .
- وف نفس الوقت كنوع من أنواع الجذب للاستثمار البلجيكى والفرنسى والإنجليزي ، باعفائهم من مشقة البحث عن سفينة و مشقة البحث عن شركات التأمين .
**** لكن ايه هو تعريف البيع سيف CIF :
هو شرط أو عقد بيع لبضائع بيتم التسليم فيه علي ظهر السفينة اللي بيختارها البائع فى ميناء الشحن حتى ميناء التفريغ ، عشان كده هتلاقى أن اجمالى عملية البيع البضاعة محل العقد بيشتمل على ثلاثة عناصر :
- تكلفة البضاعة نفسها COST
- أجرة النقل Freight
- التأمين على البضاعة Insurance
****** ثانيا : ماهى نقطة التسليم اللى عندها يكون البائع أوفى بالالتزام قدام المشترى ، وتنتقل المخاطر على عاتق المشترى ؟؟
نقطة التسليم هنا : ظهر السفينة On Board ، وبداية من عملية الشحن علي ظهر السفينة ، تنتقل المخاطر الخاصة بالرحلة البحرية كاملة الي المشترى .
- ثالثا : ماهى إلتزامات البائع في العقد CIF ؟؟
1- البائع ملتزم بتجهيز البضائع وتغليفها وتحزيمها
2- إعداد فاتورة تجارية بثمنها
3- التعاقد مع الناقل وسداد قيمة النولون البحرى ، اللى يختاره
4- التخليص الصادر على البضاعة في ميناء التصدير وتحمل تكلفته .
5- التعاقد على عقد التأمين البحرى ، والبائع هنا غير مكلف الا ( بالحد الأدنى فقط من عملية التأمين ) ،ولو عايز المشترى يرفع قيمة التأمين ، يبقى اما بالاتفاق مع البائع او يتحملها حسب إرادته .
6- البائع ملتزم كمان بارسال سند الشحن اللي يدل علي تمام شحن البضاعة (shipped on board )
***** رابعا : في سؤال مهم ،، ايه اللى يخلى المستورد يتعاقد على البيع سيف ؟؟؟؟
طبقا لتقارير خبراء الاقتصاد الدولى ، والاستقصاء لشروط البيع بين الموردين والمستوردين ، وجدوا أن :
- البيع سيف بيعمل حااجة اسمها ( توازن بين مصالح الأطراف وبعضها ) ، طب ممكن توضح ،
تعالى نستعرض عزيزى القارئ بعض مزايا البيع سيف .
----- : الميزة الأولي # # # # # # --
- انى كمستورد ، بتتعاقد مع طرف واحد فقط
- يعني لو افترضنا ان مشترى قدر يتواصل مع مورد لبضاعة ما او ماكينة لمصنعه مثلا ، والمورد طلع في بلد اول مرة يتعامل فيها المشترى .
- هنا لو ان المورد اتفق مع المشترى أنه هيجهز بضاعة فقط ، ومش هيتعاقد علي نقل البضائع لبلد المستورد ، هنا وبالشكل ده طبيعي ومنطقى جدا , أن المشترى لازم انه يتعاقد مع ( طرفين ) غير المورد نفسه:
-
- الأول هيكون ناقل عنده Logistics او شركة شحن تقوم بعملية النقل من باب المصنع لحد الميناء ، وتعمل عملية التخليص على البضاعة و شحنها .
- والثانى : تكلفة التعاقد مع شركة التأمين ، عشان مخاطر الطريق ( لو عايز يأمن طبعا ) .
--- الميزة الثانية # # # # # # # # :
- الحصول علي سعر تنافسي للبضاعة ، بسبب إعفاء المشترى من الدفع لأكثر من طرف تعاقدى
- لانه في الاغلب لما يكون المورد مصنع كبير او شركة دولية معروفة ، وتييجى تعرض الOffer بتاع السعر بتاعها ( CIF ) ، في الوقت ده بيكون عندها أسعار تنافسية ، لانها شركات ذا حجم وثقل .
- وبالتالي ليها اسعار تنافسية فى النقل ، وأسعار خاصة مع شركات التأمين ، ودا بسبب كمان انه عايز يجذب العميل الخارجي او المستورد للتعامل اكثر من مرة .
- طبعا لازم تعمل مقارنة فى التسعير لو تعاقدت مع أكثر طرف سواء كانت شركات شحن وشركات تامين عشان تعرف الفرق فعلا .
- خامسا : طب ايه هي عيوب البيع سيف ؟؟
- بالنسبة للبائع : --
انه لو اتفق مع المشترى على سعر CIF بسعر معين وحصل اتفاق على وسيلة الدفع ( اعتماد مستندى غير قابل للالغاء ) هنا اصبح البائع انه ملزم بالسعر الموجود فى الاعتماد خلال فترة تنفيذ التعاقد .
- الزيادة ممكن تكون ف أسعار النقل علي سبيل المثال ( زى ماكلنا معاصرين الارتفاع المتزايد فى أسعار الشحن .
- يعنى لو ان حصل زيادة للأسعار خلال الفترة دى ، المشترى في حل منها وهيتحملها البايع ويحصل خسارة لا قدر الله ، هنا ( طبعا ميزة كبيرة جدا جدا للمشترى في تقلبات الأسعار )
- بالنسبة للمشترى : ---
و خاصة في حالة الشحن بالحاويات ، بيكون المشترى ملزم بدفع ثمن البضاعة قبل الفحص للبضاعة ، يعنى لو ظهر عيب او كانت البضاعة غير مطابقة للمواصفة ، هيتحملها المشترى .
**** سادسا : ميزة البيع CIF في التقييم الجمركي :
- طبعا نقطة التشريع المصرى فى تحصيل القيمة للأغراض الجمركية بتكون كالاتي :
- البيع CIF + بند التفريغ .
- الميزة هنا ان التقييم الجمركي بيضيف ( فقط ) بند التفريغ من فاتورة THC المصدرة من الوكيل الملاحي .
- يعني مش هيضيف عليك نولون وتأمين .
- فى حالات معينة التقييم لو ملقاش فى المستندات المقدمة الفواتير المطلوبة أو أنه مقتنعش مثلا بسعر النولون المقدم ، بيطبق حاجة اسمها النولون الحكمي أو التأمين الحكمي ، ودول قيم أو نسبة من قيمة فاتورة البضاعة ، عشان يوصل لنقطة التشريع زى ما قولنا (CIF + التفريغ ) .
