12/03/2026
منقول
✍️ بقلم ( القبطان هيثم محمود ) صاحب ورئيس مجلس إدارة شركة الريتال للخدمات الملاحية .
في الأيام اللي فاتت انتشر بيان من ITF و JNG بيقول إن
مضيق هرمز والخليج العربي بقوا منطقة عمليات حربية
وإن البحارة اللي بيعدوا هناك ليهم تعويضات كبيرة وحقوق إضافية.
كتير من البحارة بدأ يسأل:
هل الكلام ده ينطبق علينا إحنا البحارة المصريين؟
خليني أوضح الموضوع ببساطة.
الكلام ده خاص باتفاقية اسمها IBF
وهي اتفاق بين نقابات دولية للبحارة وبين بعض شركات الملاحة.
يعني ببساطة:
الحقوق اللي اتقالت زي:
ضعف الراتب الاساسي مش الراتب كلو
لو البحار قرر انو عايز ينزل وميكملش ياخد شهرين راتب أساسي
- حق رفض دخول المنطقة
- تعويضات كبيرة في حالة الخطر
- رجوع البحار لبلده على حساب الشركة
كل ده بيطبق فقط على السفن اللي شغالة بعقود IBF.
لكن الحقيقة اللي ناس كتير مش واخدة بالها منها:
❗ معظم البحارة المصريين مش شغالين بعقود IBF أصلاً.
غالبية البحارة المصريين بيبقوا شغالين:
- يا بعقد مباشر مع الشركة
- يا عن طريق وكالة توظيف
- والعقد بيكون تابع لقانون علم السفينة أو شروط الشركة.
يعني ببساطة شديدة
مش أي بحار يعدي مضيق هرمز هيقبض ضعف المرتب أو يرفض الرحلة.
عشان كده مهم جداً أي بحار يعرف:
✔ نوع العقد اللي هو ماضيه
✔ السفينة تبع اتفاقيات ITF ولا لأ
✔ حقوقه المكتوبة في العقد قبل ما يطلع الرحلة.
طبعاً ده ما يمنعش إن المنطقة حالياً فيها توتر كبير،
ومضيق هرمز من أهم الممرات البحرية في العالم وأي توتر فيه بيأثر على الملاحة العالمية.
لكن لازم تبقى المعلومة واضحة للبحارة
علشان محدش يبني توقعات مش موجودة في عقده.
⚓ ربنا يحفظ كل البحارة في البحر
تحياتي لكم
قبطان ( قبطان هيثم محمود )
