18/08/2026
نقول تانى يا جمااااعة
------------------------
الصحارى المصرية والبيئة المصرية عموماً غنية بالتنوع الطبيعى فى الحشرات والحيوانات والطيور. ولكن كلها مفيش منها أى خطر يذكر لو التزمت بمعايير الأمان وبعدت عنها وعمرها ما هتهاجمك لمجرد الهجوم لكن ممكن تدافع عن نفسها فقط.
** الثعالب :
حيوانات أليفة مفيش منها أى خطر بالعكس دى بتخاف من الإنسان جدا وبتبعد عنه وبتتغذى على الحشرات والحيوانات الصغيرة زى الأرانب والفئران والفراخ وبواقى الأكل فى الرحلات والكامبات.
** الثعابين :
الثعابين السامة فى مصر عددها 9 أنواع وأخطرها الكوبرا والحية السوداء ثم الطريشة.
وتقريباً مفيش منها أى خطورة على الإنسان طالما لم يهاجمها ومش على قائمة غذائها أصلاً. وبتهرب بمجرد ما تحس بوجوده. وبتهاجم الإنسان فقط دفاعا عن نفسها وفى حالة إحساسها بالخطر أو فى حالة أنه هاجمهما وحاول يمسكها حتى لو بدون قصد. يعنى لو توخيت الحذر وبعدت عنها ومحاولتش تهاجمها او تحسسها بالخطر مفيش خطر إن شاء الله.
العقارب :
سمها ضعيف جداً وخطر على الأطفال وكبار السن ومرضى القلب فقط وبتهرب بمجرد ما تحس بأى خطر وبتخاف جداً من الإنسان ونفس الوضع بتقرص فقط فى حالة أنها حست بأى خطر أو فى حالة مهاجمتها أو لمسها حتى لو بدون قصد.
المعلومة الأهم أن سم أى كائن حى حاجة غالية جدا جدا جدا عنده وبيتعب فى تصنيعه وتكوينه ومش هيفرط فيه بسهولة أبداً إلا فى حالة أنه حس بالموت وأن نهايته قربت وبيبقا فى حالة دفاع عن النفس فقط. سواء تعابين أو عقارب أو أى حاجة. وكلها كائنات دفاعية لا هجومية.
سم العقرب ضعيف لدرجة أنه غير مميت الا فى حالات ضعيفة .. أه والله زى ما حضرتك سمعت كده. ممكن يموت طفل صغير أو راجل عجوز مناعته ضعيفة. ومعظم حالات الموت بتبقا نتيجة سكتة قلبية نتيجة أنه أتفزع وأتخض أن العقرب قرصه. أو بمعنى اصح معظم حالات الموت بسبب الوهمممممممم أو وجود مشاكل صحية كبيرة.
يعنى لو حضرتك نايم وفيه تعبان أو عقرب عدى من فوقك من غير ما تحس أو تشوفه صدقنى طول ما هوه محسش بخطر مش هيعملك حاجة أبداً وهيكمل طريقه عادى جداً لأنك مش هدف بالنسباله ولا على قائمة غذاءه أصلا. وكذلك استخدام الشيح والتوم والبصل لا يتسبب فى طرد الطريشة ولكنها تخاريف وخزعبلات قديمة.
ده مش كلامى بس ده نتيجة خبرة سنوات فى الصحارى والسفر وكلام خبراء كتير فى الحياة البرية أتعلمنا منهم كتير فى رحلاتنا وممكن تبحثوا على النت وتتأكدوا من الكلام ده. لأن للأسف الثقافة البرية المصرية كلها خزعبلات. زى ثعبان الطريشة اللى بيطير عشرة متر وبيهاجم الإنسان أو الخفاش اللى بيهاجم الإنسان برضه وبيلزق فى وشه.
ثعبان الطريشة من أخطر الثعابين فى الصحارى المصرية لكنه لا بيهاجم الإنسان ولا بينط 10 متر, كبيره 20-30 سم أو قدر طوله ولو حس بخطر برضه, ولو شوفته وشافك ووقفت ثوانى هيجرى يستخبى بعيد, أنت بالنسباله مصدر تهديد مش أكلة ومش فريسة.
طبعاً بنأكد إن الصور للتوضيح ومش أى حد يعمل كده خالص. وممنوع يقرب منها نهائى عشان متحسش بخطر وتهاجم.
البوست مش تقليل من خطر هذه الكائنات بالعكس دى كائنات على قدر كبير من الخطورة ولكن للتوعية والتوضيح وعشان نأكد أن كل حاجة من دى لها دورها الحيوى فى الطبيعة والحياة البرية وربنا مخلقهاش عبثا وأهمية وجودها عشان تكمل الدورة الحياتية للكائنات كلها وأنها فى بيئتها الأصلية والانسان هوه اللى دخيل عليها.
حقوق الصور محفوظة للمستكشف المصرى
شير وعرف المصريين حقائق كتير غايبة عنهم وشارك فى حملة التوعية بالحياة البرية وثروات مصر الطبيعية.
-------------------------------------------------------------------------
تابعونا
لمتابعة الصور والرحلات والاستكشافات :
لينك الأنستجرام :
https://www.instagram.com/egyptian_discovery/
لينك التليجرام :
https://t.me/EgyptianDiscovery888
لينك تيك توك :
https://www.tiktok.com/.elrasoul?_t=ZS-90XwYC7yjBP
--------------------------------------------------------------------------
متعوا عيونكم بكل هذا الجمال الخفى
©️ حقوق الصور والنشر محفوظة للمستكشف المصرى
شير وعرف المصريين جمال وكنوز بلدهم
#سافر
