Elnady Logistics Company

05/05/2026

فاكرين مشهد فيلم "سلام يا صاحبي" لما الباشا حسان (صاحب اجانس العربيات) حب يلبس "بركات" قضية تهريب، وخلاه يمضي على عقد بيع العربية باسمه؟ لولا نباهة "مرزوق" اللي خلى "بركات" يمضي بإسم وهمي "حسونة الأشول" وبالإيد الشمال، كان "بركات" راح في داهية.
المشهد ده درس "استيرادي" من العيار الثقيل 👇

💢الفخ اللي بيقع فيه المستورد:
المستورد النهاردة شخص متعلم ومثقف، وأكيد بيعرف إنجليزي كويس.. لكن لما بتيجي تتعاقد مع مورد في الصين أو الهند، العقود غالباً بتكون نسختين (لغة البلد الأم + نسخة إنجليزية).
في أغلب العقود الدولية، بيبقى فيه بند بيقول: "في حالة وجود اختلاف بين النص الإنجليزي والنص المحلي (الصيني مثلاً)، يُعتد بالنص المحلي". يعني ببساطة، ممكن الكلام اللي بالصيني يكون فيه شروط جزائية أو تنازلات أنت متعرفش عنها حاجة، والنسخة الإنجليزية اللي في إيدك "مجرد ديكور" لا يعترف بها القضاء في دولة المصدر لو حصل نزاع.
جهل المشتري بقراءة العقد مش معناه إنه "مش متعلم"، لكن معناه إنه "مش متخصص". المورد ممكن يكتب بند يخلي مسؤوليته تماماً عن جودة البضاعة، أو يحدد محكمة محلية في قرية نائية في الصين لفض النزاعات، وأنت بتمضي وأنت فاكر إنك بتأمن نفسك.

💢ليه لازم يكون معاك "واحد بيقرأ صيني"؟
الاستيراد مش مجرد "أوردر" بتطلبه وشكراً، دي عملية ليها أبعاد قانونية وفنية معقدة:
1. المصطلحات الفنية: الترجمة الحرفية من الإنجليزي للصيني ممكن تغير معنى "شرط جزائي" أو "مواصفة فنية" تماماً.
2. ثغرات العقود: المورد بيبقى حريص يضمن حقه بلغه بلده، وأنت لازم تكون حريص تضمن حقك بنفس اللغة.
3. تجنب "الملعوب": زي ما مرزوق شم ريحة الملعوب من "الباشا حسان"، أنت كمان لازم تشم ريحة الملعوب في بنود العقد قبل ما تمضي.

💢عشان ما تقعش في فخ "الباشا حسان"
• ما تكتفيش بالإنجليزي: لو العقد بلغة تانية، لازم حد متخصص (مترجم قانوني أو مكتب استشارات فاهم لغة وكمان فاهم تجارة) يراجع النسخة الأصلية كلمة كلمة.
• اعرف أبعاد العملية كلها: من أول التعاقد لحد التخليص الجمركي. الجهل ببند واحد في العقد ممكن يخلي شحنتك تقف في الميناء أو تخسر فلوسك بالكامل.
• التفاصيل الصغيرة هي اللي بتغرق: ركز في بنود التحكيم، والمواصفات الفنية، وشروط التسليم (Incoterms)، وما تخليش الاستعجال يخليك تمضي على "بياض".

19/03/2026

19/03/2026

لو في دايرتك القريبة "مستخلص جمركي"، سواء كان صديق ، أو قريب، أو حتى جار اللي بتقابله على السلم.. أكيد لاحظت عليه الأيام دي إنه عصبي زيادة، خلقه ضيق، ولو كلمته في التليفون ممكن ميردش عليك بالساعات، ولما يرد تلاقي صوته طالع بالعافية.
اعذروهم.. أصلكم متعرفوش "حياة المستخلص" بتبقى عاملة إزاي، خصوصاً في الأسبوع الأخير من رمضان اللي قبل إجازة العيد مباشرة.
إنت بتشوفه وهو راجع قبل الفطار مهبط، بس متعرفش إنه كان في سباق مع الزمن.
المستخلص الجمركي في رمضان بيتحط في "ضغط عصبي" ميتوصفش.
إنت متخيل يعني إيه مطلوب منه يخلص إجراءات الشحنة في ساعات عمل لا تذكر؟
• البنوك: بتفتح 4 ساعات بس.
• التوكيلات الملاحية: هما كمان 4 ساعات.
ده غير الجهات الحكومية اللي مواعيدها الرسمية من 10 الصبح لحد 2 الظهر، بس فعلياً وبحكم "الصيام" والزحمة، بتصفي على 3 ساعات شغل حقيقي. في الـ 180 دقيقة دول، المخلص لازم يكون زي "الأخطبوط"؛ عين على السيستم، ورجل في الساحة، وإيد بتمضي أوراق، ودماغ بتفكر في "زمن الإفراج".
كل كوم، والأسبوع الأخير اللي قبل العيد ده كوم تاني خالص. إحنا في المهنة دي بنرفع حالة الطوارئ للدرجة القصوى. بيبقى هدفنا الوحيد "نفرج عن أكبر قدر من الشحنات".
لأن إجازة العيد 5 أيام، والشحنة اللي هتفضل مركونة في الميناء طول الإجازة دي هتاكل قلب المستورد من المصاريف والأرضيات، وهتخسره مبالغ ضخمة.
المستخلص هو الوحيد اللي شايل هم "زمن الإفراج" بجد.
أي حد تاني ممكن ييجي في المركز التاني أو التالت، لكن المستخلص هو اللي في المدفع.. هو اللي متصدر للمستورد اللي بيغلي من القلق وعايز بضاعته تدخل مخازنه قبل وقفة العيد، وهو في نفس الوقت اللي بيتحمل برود بعض الموظفين اللي ماشيين بمبدأ "فوت علينا بكرة يا سيد".
الضغط العصبي ده لا يمكن وصفه، إحنا فعلياً بنحارب في جبهات كتير في وقت واحد عشان "نفرج" عن الحاوية.
إحنا فعلياً بقالنا أيام منمناش، عيونا زغللت من شاشات الكمبيوتر ومن الجري في الساحات تحت المطر.
لكن خلاص، وصلنا للمحطة اللي محتاجين فيها "نفصل".
من الليلة دي، هنعلن حالة "البيات الشتوي" زي الدب القطبي. ومحدش يحاول يصحينا ولا حتى يرن علينا، لحد الساعة 11:59 مساءً يوم السبت الموافق 21 مارس 2026.
ليه التوقيت ده بالذات؟ لأن "النافذة" (السيستم) هتدخل في مرحلة صيانة، ومش هنعرف ندرج أي رقم ACID في الفترة دي. يعني "قُضي الأمر"، مفيش في إيدينا حاجة نعملها غير إننا ننام ونرتاح من المطحنة اللي فاتت، عشان نشحن طاقتنا للمطحنة اللي جاية
كل سنة وأنتم طيبين، اعذرونا لو قصرنا، وادعولنا في الأيام دي ببركة الوقت والجهد. وعيد سعيد عليكم وعلى كل حبايبكم 💚

01/03/2026

إيران أعلنت إن المضيق "ممنوع لمرور أي سفينة". حالياً فيه أكتر من 800 سفينة (بين ناقلات بترول وصب وحاويات) محبوسة جوه الخليج العربي مش عارفة تخرج، والسفن اللي كانت رايحة "جبل علي" أو "حمد" خدت أوامر فورية بالانتظار في "مناطق آمنة"
• التأثير اللوجستي: ميناء "جبل علي" وموانئ الخليج أصبحت شبه معزولة حالياً. السفن اللي جوه مش عارفة تخرج، واللي بره مش قادرة تدخل.
• أسعار الطاقة: توقعوا قفزات جنونية في أسعار البنزين والسولار عالمياً، وده معناه إن "نوالين الشحن" هتزيد بشكل تلقائي نتيجة ارتفاع تكلفة الوقود.

💢قناة السويس:
للأسف، الأمل اللي كان عندنا إن 2026 تكون سنة رجوع الخطوط الملاحية بكامل قوتها لقناة السويس، اتهز بقوة.
شركات زي Maersk و CMA CGM و Hapag-Lloyd أعلنت تعليق العبور من السويس والاعتماد على "طريق رأس الرجاء الصالح".
• التأخير ده معناه "غرامات تأخير"، وتكدس في الموانئ البديلة، ونقص في الحاويات الفاضية اللي هترجع تتوزع من جديد بصعوبة.
• شركات التأمين بدأت ترفع "أقساط مخاطر الحرب" لمستويات غير مسبوقة، وفي شركات سحبت التغطية تماماً عن السفن اللي بتقرب من منطقة الصراع.

💢الشحن الجوي كمان اتأثر مع إغلاق مجالات جوية وتغيير مسارات الطيران، وده ضغط على سلاسل الإمداد للمواد الحساسة والالكترونيات.

إ🔹حنا قدام "عنق زجاجة" حقيقي. الملاحة الدولية بتمر بأصعب اختبار ليها في العصر الحديث. إغلاق هرمز مع توتر باب المندب معناه إن حوالي 20% لـ 25% من تجارة العالم بقت بتمشي في "طرق التفافية" طويلة ومكلفة.

18/02/2026

رمضان كريم 🌖 🌛

09/02/2026

من اول ما اتعملت منظومة "نافذة"، وكلنا استبشرنا خير بالهدف الأسمى وهو "الفحص المشترك".
الفحص المشترك ده روح العمل الجمركي الناجح. المنطق بيقول إن لما يكون عندي شحنة محتاجة فحص جمركي ومعاها عرض على جهة رقابية (زي سلامة الغذاء أو الطاقة الذرية)، المفروض الحاوية تفتح "مرة واحدة" بس.

💢ليه الفحص المشترك مهم:
1. كتر فتح وقفل الحاوية وطلوع ونزول البضاعة بيعرضها للتلف، خصوصاً لو بضاعة حساسة.
الفحص المشترك بيخلينا نطلع البضاعة مرة واحدة قدام كل اللجان.
2. عشان تنزل حاوية في ساحة الفحص، بتقدم "طلب تنزيل". في أحسن الظروف الحاوية بتنزل تاني يوم، ولو حظك في ساحة زي "تحيا مصر"، الموضوع ممكن يوصل لـ 4 أيام انتظار. تخيل بقى لو عملت الفيلم ده مرتين
3. تنزيل الحاوية مش ببلاش، ده غير غرامات التأخير والأرضيات اللي بتدفع بالدولار للتوكيلات الملاحية، وده عبء على العملة الصعبة وعلى جيب المستهلك في الآخر.

🔸المشكلة بتظهر لما يكون "البند الجمركي" نفسه مش محتاج عرض رقابي، لكن "نوع نشاط الشركة" هو اللي بيفرض العرض.
هنا "نافذة" عملت حل نظري ممتاز وهو "التزييلات" اللي بنحطها وقت إدراج البيان الجمركي:
• عايز عرض طاقة ذرية؟ بتحط تزييل رقم 591.
• عايز عرض سلامة غذاء؟ بتحط تزييل رقم 590.
المفروض السيستم يفهم فوراً وينزل لك طلب فحص للجهة دي مع الجمارك في "لجنة مشتركة". لكن الواقع العملي بيقول إننا بنصطدم بـ "أخطاء برمجية" تخلي التزييل ده "قلته أحسن منه".

🔸من واقع التجارب العملية في شحناتنا، لما بنحط تزييل 590 الخاص بسلامة الغذاء وكمان تزييل ق4580
بنتفاجئ بعد إدراج البيان إن التزييل "مسمعش" وعرض سلامة الغذاء منزلتش

💢هنا بتبدأ المأساة:
1. تحاول تلحق نفسك وترفع "طلب تظلم" عشان يضيفوا العرض، تلاقي رد إن "المتمن المستندي" ملوش صلاحية يضيف العرض لأن الشهادة "مش مفتوحة عنده"، دي راحت لساحة الفحص عند "مأمور الحركة".
2. تضطر تقدم طلب تنزيل وتفحص مع الجمارك (مأمور الحركة) وتخلص، وبعدين المتمن اللي في الساحة هو اللي يفتح لك عرض سلامة الغذاء "يدوي".
3. الحاوية تترفع تاني، وتقدم طلب تنزيل جديد عشان تفحص مع سلامة الغذاء وتستنى كذا يوم عشان الحاوية تنزل
ده مش بس هدر وقت، ده تدمير لمنطق "النافذة الواحدة" من أساسه.

💢مطالبنا من شركة MTS (المشغل للمنظومة)
• مراجعة أكواد التزييلات: لازم فريق البرمجة في MTS يتأكد إن التزييل بمجرد وضعه "يُجبر" السيستم على استخراج طلب الفحص فوراً قبل ما الشهادة تروح للساحة.
• القائمة المنسدلة (Drop-down Menu): ياريت تريحونا وتفتحوا خانة اختيار جهة العرض الرقابية في "قائمة منسدلة" للمستخلص وقت الإدراج، زي ما هي ظاهرة قدام المتمن الجمركي، عشان نضمن إن العرض نزل صح من أول لحظة.

🔹ملحوظة على الماشي: النهاردة 8 فبراير، المنصة عملت "تحديث"، وكالعادة مفيش أي إعلان رسمي يعرفنا إيه اللي اتغير.
الشفافية يا جماعة هي أساس الثقة، مش معقول نفضل نكتشف التحديثات بالصدفة وإحنا شغالين وبنجرب في شحنات الناس

22/01/2026

مش لاقى عنوان مناسب للمنشور ولأن شخصيتى ليست تصادمية هاحاول بقدر الإمكان أكون هادئ وانا باسرد مانعانيه نحن العاملون فى مجال التخليص الجمركي بصفتنا ممثلون عن المستوردين سواء للإتجار أو للتصنيع ومع أن سياسة وتعليمات أعلى جهة فى الدولةبالتخفيف عن كاهل المواطنين بصفه عامه والتوجيه بتقليل زمن الإفراج الجمركى دون الإخلال بجهات العرض ومن هنا أبدأ الحديث عن معضلة المعضلات متمثلة فى جهة عرض الدمغة والموازين وهى تتبع وزارة التموين والتجارة الداخليه أنشئت بهدف الحماية وليست الجباية كما هو حاصل الأن وايضاً الرقابة على جودة المصوغات والمعادن الثمينه والموازين وذلك من خلال عدة فروع فى عدة مدن مصرية ولا يستطيع أحد إنكار دورها وأهميتها ولا يجروء أحد على إغفال جهة عرض وإن كان مطلوب على مستوى عالٍ من أهل الخبرة والاختصاص تنقية وتمحيص وفحص تذييل بعض البنود الجمركية التى لا تزال متشعبة بين أكثر من جهة
وعودًا إلى عروض الدمغة والموازين التى تستهلك الوقت والمجهود والمال ايضاً بين رحلة تبدأ من قرية البضائع بصحبة مندوب جمرك لتسليم العينه إلى مقرها بمدينة العبور لتبدأ رحلة صاحب الشأن مستورداً كان للإتجار او للتصنيع أو استخدام خاص للمصنع تبدأ رحلة الفحص إما بمقر المصلحة بالعبور أو بفرع ترسا بالهرم أو بمقر هيئة المواصفات والجودة بالأميرية أو بالهيئة العامة للرقابة على الصادرات والواردات بالمطار وبعد سداد الرسوم المقررة على فحص المشمول وغالبا مبالغ كبيرة لدرجةٍ استفزازية يدفعها المستهلك فى نهاية الأمر
ايضاً التوسع فى عرض أصناف لايمكن لموظف الجمرك غض الطرف عنها لأن تزييل البند يحدد جهة العرض شئنا أم أبينا على سبيل المثال أسياخ اللحام الواردة لمصنع تصنيع لوحات كهربائيه تعرض هذة الأسياخ على المصلحة لبيان احتوائها على معدن ثمين من عدمه ‼️
خامة كيماوية صفراء اللون أو حبر كتابة أصفر اللون يعرض لبيان احتوائهم على معدن ثمين من عدمه رغم أن تحليل الكيميا الذى تقوم به هيئة الرقابة على الصادرات والواردات كفيل بتوضيح ذلك
لماذا لا يوجد مكتب للمصلحة بقرية البضائع وبه مهندسون وفنيون تابعين لمصلحة الدمغة والموازين ويقررون الاكتفاء بالفحص الظاهري أو باجهزة حديثة مما يحمل باليد أو التوجيه مباشرة للعبور او ترسا أو الأميرية أو للواردات ويصدر الإفراج منهم مع سداد الرسوم المستحقة
ياليت توسيع آلية البرتوكول المشترك بين الدمغة والموازين والهيئة العامة للرقابة على الصادرات والواردات لتشمل الفحص وتقدير الرسوم والتوجيه أو تفويض الأخيرة بهذة المهام ف للحق الهيئة العامة للرقابة على الصادرات والواردات من أنجح الجهات الرقابية اللى ممكن تتعامل معاها
وإذا كانت الجهات السيادية لها تواجد في قرية البضائع ومكاتبهم مفتوحه .. امن وطنى .. مباحث .. امن عام .. مخابرات .. وكثيرا مانلجأ لهم
فالماذا لا يوجد مكتب لمصلحة الدمغة والموازين بقرية البضائع رغم تواجد بعض المهندسون التابعون للمصلحة فى مقر اللوجيستى لكنهم بدون صلاحيات
تطلب المصلحة من العميل احضار شهادة فحص معتمدة من جهة دوليه ودى طبعا بفلوس يتكبدها العميل ولا تعترف بها المصلحة اهه اي كلام وخلاص مرة بحجة ان العدد الوارد بكميات كبيرة ويجب فحصه ومرة لانها مش هى دى المطلوبه ⁉️ طب كلفنا المستورد بالعمله الاجنبيه برا ليه
المصلحة بجلالة قدرها تطلب من المستورد فنى يحضر عندهم ويشرح لهم هى مستورد ايه وبيعمل ايه!!
أو إحضار كتالوج يوضح ماهية الصنف ايه !! وسدد يافندم رسوم فحص مبالغ طائله يسددها المستورد صاغراً ويحصلها من المستهلك فى صورة المنتج النهائي ويدفعها صاغراً
وفى نهاية المطاف نهاجم الجمرك على التأخير فى الإفراج مشاكل النافذة تصب فى الجمرك
مشاكل جهات العرض تصب فى الجمرك
أعطال السيستم الجمرك
إذا رسالتى وضحت أتمنى نحافظ على اسم بلدنا ماينفعش يتقال على مصر اي كلام يزعل والله مصر غالية والله مصر غالية والله مصر غالية
هذا المنشور بصفتى صاحب مكتب تخليص جمركى بيحب بلده وليس بصفتى نائب رئيس اللجنه النقابية لمستخلصى القاهرة