25/02/2026
ڈی جی فرنٹیئر ورکس آرگنائزیشن (FWO) میجر جنرل عبدالسمیع نے اپنی ٹیم کے ہمراہ وفاقی وزیر ریلوے محمد حنیف عباسی سے ملاقات کی، جس میں پاکستان ریلوے کے جاری اور مجوزہ ترقیاتی منصوبوں پر تفصیلی تبادلہ خیال کیا گیا۔
ملاقات کے دوران ایف ڈبلیو او کے تعاون سے جاری منصوبوں پر وفاقی وزیر کو بریفنگ دی گئی اور ریلوے کی ڈیجیٹلائزیشن کے پہلے مرحلے کے تحت 13 اہم منصوبوں پر پیش رفت سے آگاہ کیا گیا۔ حکام نے بتایا کہ جدید ٹیکنالوجی کے ذریعے ریلوے نظام کو عصرِ حاضر کے تقاضوں کے مطابق ڈھالنے کا فیصلہ کیا گیا ہے۔
اجلاس میں ریلوے ٹریکنگ سسٹم اور جی پی ایس ٹریکنگ متعارف کرانے کی تیاریوں پر بھی غور کیا گیا، جس کے بعد ٹرین آپریشنز کی مؤثر نگرانی اور بروقت مانیٹرنگ ممکن ہو سکے گی۔ بڑے ریلوے اسٹیشنز پر وائی فائی کی سہولت فراہم کرنے اور لوکوموٹیو چیک پوائنٹس قائم کرنے کے منصوبے بھی زیرِ بحث آئے۔
ذرائع کے مطابق راولپنڈی کی طرز پر سیف اینڈ اسمارٹ ریلوے اسٹیشنز کے قیام کا دائرہ کار دیگر شہروں تک بڑھانے پر غور کیا گیا، جبکہ لاہور میں مرکزی کنٹرول روم اور تمام ایچ آر ڈویژنز میں کنٹرول رومز کے قیام کی منظوری سے متعلق امور پر بھی تبادلہ خیال کیا گیا۔
اجلاس میں جدید ڈیٹا سینٹر کے قیام کو ریلوے نظام کی کارکردگی بہتر بنانے کے لیے اہم پیش رفت قرار دیا گیا۔ اس کے علاوہ ایم ایل-3 منصوبے کی پیش رفت کا جائزہ لیا گیا اور تھر کول منصوبے کے ذریعے ریلوے نیٹ ورک کو مستحکم بنانے اور توانائی کے مؤثر استعمال پر بھی تفصیلی گفتگو کی گئی۔
وفاقی وزیر ریلوے نے اس عزم کا اظہار کیا کہ جدید ٹیکنالوجی اور شفاف نظام کے ذریعے پاکستان ریلوے کو ایک مؤثر، محفوظ اور جدید سفری سہولت میں تبدیل کیا جائے گا
