22/09/2026
Hukumar Kula da Zirga-Zirgar Ababen Hawa ta Kano, KAROTA, ta ƙaddamar da tsarin **Overloading Control (OC)** a tashoshin mota daban-daban a jihar, domin dakile lodin fasinjoji fiye da adadin da doka ta amince da shi. Matakin na daga cikin ƙoƙarin hukumar na ƙara inganta tsaron ababen hawa da kare rayukan fasinjoji.
Mataimakin na musamman ga shugaban hukumar kan harkokin yada labarai Mu’azzam Mansur kurawa ne ya fitar da sanarwar a Litinin, 21/09/2026, bayan kammala ganawa da shugabannin tashoshin motoci da kungiyoyin sufuri na nan Kano wanda ta tattaunawar ta gudana a karkashin jagorancin Manajan Daraktan KAROTA, Injiniya Faisal Mahmud Kabir, domin samar da tsarin hadin gwiwa wajen dakile cunkoso da lodin fasinjoji fiye da kima.
Tsarin zai samar da wuraren ofishin overloading control a tashoshin mota, inda jami’an KAROTA za su duba yawan fasinjojin da mota za ta ɗauka. Haka kuma, za a rubuta bayanan fasinjoji a cikin kundin tafiya kafin mota ta tashi, tare da duba fasinjoji da kayansu domin tabbatar da cewa ba a wuce adadin da motar ta amince da ɗauka ba.
KAROTA ta ce manufar matakin ita ce rage haɗarin da ke tattare da cika mota da fasinjoji, kare direbobi da matafiya, da kuma rage lalacewar ababen hawa da ka iya tasowa sakamakon lodin da ya wuce kima. Hukumar ta kuma buƙaci ƙungiyoyin sufuri, masu motoci, direbobi da jami’an tashoshin mota su ba da cikakken haɗin kai wajen aiwatar da sabon tsarin.
