Jet Teller អាកាសចរណ៍

17/07/2025

រវាង អ៊ែរប៊ើស Airbus350 របស់អឺរ៉ុប និង ប៊ូអុីង Boeing787 របស់អាមេរិក តើអ្នករើសយកមួយណា? ទាំង ២ ប្រភេទ សុទ្ធតែយន្តហោះដឹកអ្នកដំណើរប្រភេទចុងក្រោយរបស់ក្រុមហ៊ុន ទាំង ២ ប្រភេទសុទ្ធតែផ្តល់ជូននូវផាសុកភាពដល់អ្នកដំណើរ ទាំង ២ ប្រភេទសុទ្ធតែត្រូវបានរចនាឡើងយ៉ាងប្រណិត ទាន់សម័យ ព្រមជាមួយនឹងបច្ចេកវិជ្ជាដ៏ទំនើបចុងក្រោយក្នុងវិស័យអាកាសចរណ៍សម្រាប់ហោះហើរចំងាយជិតឆ្ងាយ ជម្រើសស្ថិតនៅលើក្រុមហ៊ុនអាកាសចរណ៍ និងអ្នកដំណើរផ្ទាល់។

រូបភាព យន្តហោះទាំង២ប្រភេទ នៃអាកាសចរណ៍ជាតិ ទួកគី (Turkish Airlines TK) 🇹🇷

15/06/2025

ជើងហោះហើរ វែងបំផុតរបស់ពិភពលោក ចម្ងាយ ១៧០១៥គ.ម (ចំណាយពេលជាង ២០ម៉ោង) របស់ Qantas គ្រោងនឹងដំណើរការនៅឆ្នាំ ២០២៧។

ក្រុមហ៊ុនអាកាសចរណ៍ Qantas គ្រោងនឹងបើកដំណើរការ ជើងហោះហើរពាណិជ្ជកម្មដោយមិនឈប់ចុះចត (non-stop commercial flight) ដែលវែងជាងគេបំផុត នៅលើពិភពលោក ក្នុងឆ្នាំ ២០២៧ ដោយតភ្ជាប់ទីក្រុងស៊ីដនី ទៅទីក្រុងឡុងដ៍ ក្នុងចម្ងាយប្រមាណ ១៧០១៥គីឡូម៉ែត្រ ជាមួយរយៈពេលធ្វើដំណើរជាង ២០ម៉ោងប៉ុណ្ណោះ។

គម្រោងជើងហោះហើរនេះ ត្រូវបានគេដឹងថាជាផ្នែកនៃ "Project Sunrise" របស់ក្រុមហ៊ុនអាកាសចរណ៍ Qantas ដែលនឹងផ្តល់ជូនអ្នកដំណើរ នូវបទពិសោធន៍ពិសេស នៃការមើលឃើញថ្ងៃរះពីរដង ក្នុងអំឡុងពេលធ្វើដំណើរ លើជើងហោះហើរមួយនេះ។

ក្រុមហ៊ុន Qantas ក៏គ្រោងនឹងប្រើប្រាស់យន្តហោះ Airbus A350-1000 ដែលបានរចនាឡើងយ៉ាងពិសេស សម្រាប់ផ្តោតលើការធ្វើដំណើរដ៏វែងឆ្ងាយ យ៉ាងមានផាសុកភាព រួមទាំងលក្ខណៈពិសេសរបស់កាប៊ីន ដែលបានធ្វើការ Upgrade រួច និងតំបន់សុខភាព (wellness zones) ផងដែរ។

ជើងហោះហើរនេះ មានគោលបំណង កាត់បន្ថយពេលវេលាធ្វើដំណើរសរុប ដោយមិនចាំបាច់មានការឈប់សម្រាកចុះចត ដែលធ្វើឱ្យវាក្លាយជាកត្តាផ្លាស់ប្តូរ សម្រាប់ការតភ្ជាប់ជាសកល និងភាពធន់នៃប្រព័ន្ធអាកាសចរណ៍។

អ្នកជំនាញអាកាសចរណ៍ ក៏បានចាត់ទុកគម្រោងនេះថា ជាចំណុចសំខាន់ ក្នុងការធ្វើដំណើរតាមផ្លូវអាកាសរយៈចម្ងាយឆ្ងាយ ដែលជម្រុញ ឱ្យមានការកម្រិតប្រសិទ្ធភាព ប្រព័ន្ធវិស្វកម្មយន្តហោះ និងបទពិសោធន៍អ្នកដំណើរ ផងដែរ។

ប្រភព៖ Qantas Airways

14/06/2025

ពត៌មាន​លម្អិត​បន្ថែម​អំពី​គ្រោះថ្នាក់ធ្លាក់យន្តហោះនៃអាកាសចរណ៍ ឥណ្ឌា (Air India) Boeing 787-8 ជើងហោះហើរលេខ AI171 នៅ Ahmedabad ប្រទេសឥណ្ឌា។ សារពត៌មាន រ៉យទ័រ បានរាយការណ៍ថាមនុស្សជាង 290 នាក់បានស្លាប់ហើយមានអ្នកនៅរស់រានមានជីវិតតែម្នាក់ប៉ុណ្ណោះដែលជាជនជាតិឥណ្ឌា សញ្ជាតិអង់គ្លេស វ័យ 40 ឆ្នាំ ដោយគាត់បានអង្គុយនៅកៅអីលេខ 11A។

គាត់​បាន​លើកឡើងថា យន្តហោះមានការពិបាកពេលហោះឡើងទៅកាន់រយៈកម្ពស់ដែលបានកំណត់ បន្ទាប់មកមាន​ការផ្ទុះ​យ៉ាង​ខ្លាំង​ក្នុងរយៈប៉ុន្មាននាទីបន្ទាប់​ពី​យន្តហោះហោះ​ឡើង​បន្តិច។

«ខ្ញុំ​បាន​ឃើញផ្សែង និង​ភ្លើងនៅពាសពេញ និងពហុនិកាដែលបានស្លាប់បាត់បង់ជីវិតនៅចំពោះមុខ ហើយខ្ញុំក៏ព្យាយាមលូនចេញពីបំណែកយន្តហោះទាំងលំបាក»។

ខណៈដែលយន្តហោះបានធ្លាក់ វាបានបុកចូលទៅក្នុងអគារលំនៅដ្ឋានរបស់មហាវិទ្យាល័យវេជ្ជសាស្ត្រមួយ ដែលសំណាក់សុទ្ធតែជានិស្សិតពេទ្យ បណ្តាលឲ្យនិស្សិតមួយចំនួនត្រូវបាត់បង់ជីវិតផងដែរ។

ក្រុមហ៊ុន Tata Group ដែលជាម្ចាស់ក្រុមហ៊ុនអាកាសចរណ៍ ឥណ្ឌា Air India បានប្រកាសផ្តល់សំណងចំនួនប្រហែល 117,000ដុល្លាអាមេរិក ដល់ក្រុមគ្រួសាររបស់ជនរងគ្រោះម្នាក់ៗ។ ក្រុមហ៊ុន​ក៏​សន្យាជួយ​សាងសង់​លំនៅឋាន​និស្សិតពេទ្យឡើង​វិញ និង​រ៉ាប់រង​ថ្លៃ​ព្យាបាល​អ្នក​រងរបួសទាំងអស់ទៀតផង។

គួររំលឹកផងដែរថា យន្តហោះ Boeing 787-8 (VT-ANB) របស់អាកាសចរណ៍ ឥណ្ឌា (Air India) ដែលត្រូវបានដាក់ឲ្យប្រើប្រាស់លើកដំបូងក្នុងឆ្នាំ 2014 ជើងហោះហើរលេខ Al171 ដែលគ្រោងធ្វើដំណើរពីទីក្រុង អាមេនដាបាត ប្រទេសឥណ្ឌាឆ្ពោះទៅកាន់ទីក្រុង ឡុងដ៏ នៃចក្រភពអង់គ្លេស បានធ្លាក់ភ្លាមៗបន្ទាប់ពីហោះឡើងប៉ុន្មាននាទី ដែលតាមសេចក្តីសន្និដ្ឋានត្រួសៗអាចបណ្តាលមកពីកំហុសបច្ចេកទេសរបស់អាកាសយានិក រឺមកពីបច្ចេកទេសយន្តហោះផ្ទាល់ដែលមិនដំណើរការនៅផ្នែកណាមួយ។

មានមនុស្សចំនួន 242 នាក់នៅលើយន្តហោះ រួមទាំងអាកាសយានិក 2 នាក់ និងសមាជិកពហុនិកា 10 នាក់ ព្រមទាំងអ្នកដំណើរចម្រុះជាតិសាសន៍ រួមមាន​ជនជាតិ​ឥណ្ឌា ១៦៩​នាក់ អង់គ្លេស ៥៣​នាក់ កាណាដា ១​នាក់ និង​ព័រទុយហ្គាល់ ៧​នាក់ ត្រូវបានសន្មតថាបានបាត់បង់ជីវិតទាំងអស់ ដោយនៅរស់រានមានជីវិតតែម្នាក់គត់។ ឯចំនែកមូលហេតុ​ពិតប្រាកដនៃ​ការ​ធ្លាក់​យន្តហោះ​នេះ​កំពុង​ស្ថិត​ក្រោម​ការ​ស៊ើបអង្កេត​នៅឡើយ​។

01/06/2025

ក្រឡេកមកមើលដំណើរដ៏គួរអោយចាប់អារម្មណ៍នៃយន្តហោះ ATR72 ថ្មីរបស់អាកាសចរណ៍ជាតិ ចាប់ពីពេលយន្តហោះត្រូវបានលាបថ្នាំពណ៌ស្របទៅតាមនិមិត្តសញ្ញាក្រុមហ៊ុន និងចុងក្រោយធ្វើការដាក់អោយហោះហើរជាលើកដំបូង សម្រាប់ជើងហោះហើរពាណិជ្ជកម្ម។

30/05/2025

ក្រុមហ៊ុនអាកាសចរណ៍ហុងកុង (Cathay Pacific) បានសម្រេចបើកជើងហោះហើរដោយត្រង់ឡើងវិញពី ទីក្រុងហុងកុង (HKG) ទៅ ទីក្រុងអាដឺឡែត (ADL) ប្រទេសអូស្ត្រាលី ដែលគ្រោងនឹងចាប់ផ្តើមនៅថ្ងៃទី ១១ ខែវិច្ឆិកា ឆ្នាំ ២០២៥ បន្ទាប់ពីអាក់ខានអស់ជាច្រើនឆ្នាំបណ្តាលមកពីការរីករាលដាលនៃជំងឺកូវីត១៩ នាពេលកន្លងមក។

ក្រុមហ៊ុននឹងដំណើរការជើងហោះហើរនេះចំនួន ៣ ដងក្នុងមួយសប្តាហ៍ជាមួយនឹងយន្តហោះប្រភេទ Airbus A350-900។

ទីក្រុង អាដឺឡែត នេះគឺជាគោលដៅទី ៨ របស់ Cathay Pacific នៅទ្វីបអូសេអានី ដោយក្រុមហ៊ុនកំពុងដំណើរការជាប្រចាំរវាងទីក្រុងហុងកុង និងទីក្រុងអូក្លិន ប្រទេសណូវែលសេឡង់ ទីក្រុងប្រីសប៊ែន ទីក្រុងមែលប៊ន ទីក្រុងភើត និងទីក្រុងស៊ីដនី ព្រមទាំងជើងហោះហើររដូវការសម្រាប់រដូវរងាទៅកាន់ទីក្រុង Cairns និង Christchurch ផងដែរ។

កាលវិភាគហោះហើរ

ហុងកុង-អាដឺឡែត ជើងហោះហើរ CX173, ចេញដំណើរនៅម៉ោង ១១:៣០យប់, មកដល់ ១០:៣០ព្រឹក+១ នៅថ្ងៃអង្គារ ថ្ងៃព្រហស្បតិ៍ និងថ្ងៃសៅរ៍។

អាដឺឡែត-ហុងកុង ជើងហោះហើរ CX174, ចេញដំណើរនៅម៉ោង ១២:០០ថ្ងៃ, មកដល់នៅម៉ោង ១៧:៤០ល្ងាច ថ្ងៃពុធ សុក្រ និងថ្ងៃអាទិត្យ។

30/05/2025

សូមចូលរួមអបអរសាទរដល់ អាកាសចរណ៍ជាតិកម្ពុជា នូវការមកដល់នៃ អាកាសយានថ្មីសន្លាង ប្រភេទ ATR72-600 សម្រាប់បំរើកិច្ចប្រតិបត្តិការដឹកជញ្ជូនអ្នកដំណើររបស់ក្រុមហ៊ុន។

រូបដ៏ស្រស់ស្អាតនៃយន្តហោះ ATR72-600 ដែលបានមកដល់ព្រលានយន្តហោះភ្នំពេញព្រឹកនេះ!

Air Cambodia ខ្ញុំរង់ចាំជិះក្នុងពេលឆាប់ៗនេះ 🥰

អរគុណ Pross Sam សម្រាប់ផ្ញើរូបដ៏ស្រស់ស្អាតនេះមកខាងយើងខ្ញុំ ❤️

27/05/2025

ក្រុមហ៊ុនអាកាសចរណ៍របស់វៀតណាម (VietJet) បានបញ្ជាទិញយន្តហោះ Airbus A330-900neo ប្រភេទថ្មីចំនួន ២០ គ្រឿងបន្ថែមទៀតអំឡុងពេលនៃដំណើរទស្សនកិច្ចរបស់លោកប្រធានាធិបតីបារាំង អេម៉ានុយអែល ម៉ាក្រុង ទៅកាន់ទីក្រុងហាណូយ ប្រទេសវៀតណាម។ សរុបមក ក្រុមហ៊ុន VietJet បានធ្វើការបញ្ជាទិញយន្តហោះប្រភេទ Airbus A330-900neo នេះចំនួន ៤០ គ្រឿងហើយមកទល់ពេលនេះ ដែលនេះជាផ្នែកមួយនៃផែនការយុទ្ធសាស្រ្តសម្រាប់ពង្រឹងអាជីវកម្មរបស់ក្រុមហ៊ុននាពេលអនាគត។

VietJet គឺជាក្រុមហ៊ុនអាកាសចរណ៍តម្លៃទាបរបស់ប្រទេសវៀតណាម ដែលកំពុងហោះហើរប្រកួតប្រជែងនឹងអាកាសចរណ៍ជាតិវៀតណាម (Vietnam Airlines)។ បច្ចុប្បន្ន ក្រុមហ៊ុនបាននឹងកំពុងដំណើរការជាមួយនឹងប្រភេទយន្តហោះដូចជា Airbus A320, A321, A321neo, A330-300, និង Comac C909 ។

26/05/2025

អាកាសចរណ៍ ជប៉ុន (Japan Airlines) បានដាក់អោយចូលនិវត្តន៍នូវយន្តហោះប្រភេទ Boeing 777-300ER ទី១របស់ខ្លួន ដែលក្រុមហ៊ុនបានប្រើប្រាស់អស់រយៈពេលជាច្រើនឆ្នាំមកហើយ។

យន្តហោះ Boeing 777-300ER ដែលមានលេខសម្គាល់ (JA731J) ជាយន្តហោះទី១ ដែលត្រូវបានដឹកជញ្ជូនពីរោងចក្រតម្លើងនៅថ្ងៃទី ១៥ ខែមិថុនា ឆ្នាំ ២០០៤ ហើយមកទល់នឹងពេលឥលូវនេះ យន្តហោះមានអាយុកាល ២២ ឆ្នាំទៅហើយ គិតចាប់ពីពេលយន្តហោះបានត្រូវតម្លើងរួចរាល់ជាស្ថាពរ។ ដើមឡើយ យន្តហោះនេះជាយន្តហោះសម្រាប់ធ្វើការហោះហើរសាកល្បងរបស់ក្រុមហ៊ុនប៊ូអុីង ទៅលើប្រភេទ Boeing 777-300ER ព្រមទាំងជាយន្តហោះគ្រឿងទី ២ ដែលប៊ូអុីងផលិតបានសម្រេចរួចរាល់។

អាកាសចរណ៍ជប៉ុន គ្រោងនឹងផ្លាស់ប្តូរនិងជំនួសបន្តិចម្តងនូវប្រភេទយន្តហោះ Boeing 777-300ER របស់ខ្លួននេះជាមួយនឹងប្រភេទយន្តហោះ Airbus A350-1000 ដ៏ទំនើបនិងថ្មីសន្លាង ដោយបច្ចុប្បន្នក្រុមហ៊ុនអាកាសចរណ៍ជប៉ុន បាននឹងកំពុងដំណើរការយន្តហោះប្រភេទ Airbus A350-1000 ចំនួន ៩ គ្រឿង ដោយក្នុងនោះក៏មានការបញ្ជាទិញចំនួន ៤ គ្រឿងបន្ថែមទៀតផងដែរ។

អាកាសចរណ៍ ជប៉ុន (Japan Airlines) គឺជាក្រុមហ៊ុនអាកាសចរណ៍ជាតិរបស់ប្រទេសជប៉ុន។ ក្រុមហ៊ុនកំពុងដំណើរការហោះហើរទៅកាន់គោលដៅជាច្រើននៅជុំវិញពិភពលោកជាមួយនឹងប្រភេទយន្តហោះជាច្រើនដូចជា Airbus A350-900, A350-1000, Boeing 737-800, 767-300ER, 777-300ER, 787-8, និង 787-9 ។

22/05/2025

អាកាសចរណ៍អូស្ត្រាលី Qantas បានប្រកាសបើកជើងហោះហើរត្រង់តភ្ជាប់ទីក្រុង អាដឺឡែត (ADL) រដ្ឋអូស្ត្រាលីខាងត្បូង និង ទីក្រុង អូក្លិន (AKL) ប្រទេសនូវែលសេឡង់ ដែលគ្រោងនឹងចាប់ផ្តើមនៅថ្ងៃទី ៣១ ខែតុលា ឆ្នាំ ២០២៥។

ជើងហោះហើរនេះនឹងដំណើរការជាលក្ខណៈរដូវកាល ចាប់ពីថ្ងៃទី ៣១ ខែតុលា ឆ្នាំ ២០២៥ ដល់ថ្ងៃទី ៣ ខែឧសភា ឆ្នាំ ២០២៦ ដោយមានចំនួន ៤ ដងក្នុងមួយសប្តាហ៍ នៅថ្ងៃច័ន្ទ សុក្រ សៅរ៍ និងថ្ងៃអាទិត្យ ជាមួយនឹងថេរវេលាហោះហើរប្រហែល ៤ ម៉ោង និង ១៥ នាទី និងប្រើប្រាស់ជាមួយនឹងប្រភេទយន្តហោះ Boeing 737-800 ខ្នាតតូច។

21/05/2025

ក្រុមហ៊ុនអាកាសចរណ៍តៃវ៉ាន់ (Starlux) គ្រោងនឹងបើកជើងហោះហើរថ្មីដោយត្រង់ រវាងទីក្រុងតៃប៉ិ (TPE) កោះតៃវ៉ាន់ និង ទីក្រុងហ្វីនិច Phoenix (PHX) រដ្ឋអារីហ្សូណា សហរដ្ឋអាមេរិក។ នេះជាគោលដៅទី ៥ របស់ក្រុមហ៊ុននៅក្នុងទឹកដីសហរដ្ឋអាមេរិក ហើយក៏ក្លាយជាគោលដៅឆ្លងទ្វីបមកអាសុីដោយផ្ទាល់ជាលើកដំបូងពីទីក្រុងហ្វីនិចផងដែរ។

ជើងហោះហើរនេះនឹងចាប់ផ្តើមនៅដើមឆ្នាំ ២០២៦ ខាងមុខនេះ ដោយដំណើរការចំនួន ៣ ទៅ ៤ ដងក្នុងមួយសប្តាហ៍។ ជើងហោះហើរនេះនឹងមានប្រើប្រាស់ជាមួយនឹងប្រភេទយន្តហោះ Airbus A350-900 ដ៏ទំនើបនិងថ្មីសន្លាងរបស់ក្រុមហ៊ុន។

Starlux គឺជាក្រុមហ៊ុនអាកាសចរណ៍ថ្មីរបស់កោះតៃវ៉ាន់ដែលកំពុងដំណើរការហោះហើរជាមួយនឹងប្រភេទយន្តហោះថ្មីៗជាច្រើនដូចជា Airbus A321neo, A330-900neo និង A350-900។

20/05/2025

ក្រុមហ៊ុនអាកាសចរណ៍អាមេរិក (American Airlines) បានប្រកាសបើកជើងហោះហើរក្នុងស្រុកថ្មីដែលមានរយៈចម្ងាយឆ្ងាយបំផុតរបស់ខ្លួនពី ទីក្រុង Chicago (ORD) ទៅកាន់ ទីក្រុង Honolulu (HNL) នៃកោះហាវ៉ៃ។ ក្រុមហ៊ុនពីមុនធ្លាប់បានដំណើរការជើងហោះហើរនេះដែរ មុននឹងបញ្ឈប់ទៅវិញនៅឆ្នាំ ២០២១។

ក្រុមហ៊ុននឹងចាប់ផ្តើមហោះហើរនៅថ្ងៃទី ២៦ ខែតុលា ឆ្នាំ ២០២៥ ខាងមុខនេះ ដោយប្រើប្រាស់ជាមួយនឹងប្រភេទយន្តហោះ Boeing 787-8។ ទោះជាយ៉ាងណា ក្រុមហ៊ុននៅមិនទាន់បញ្ជាក់ច្បាស់ពីកាលវិភាគនៃជើងហោះហើរនេះនៅឡើយទេ។

18/05/2025

អាកាសចរណ៍ សិង្ហបុរី (Singapore Airlines) គ្រោងនឹងដាក់ឲ្យចូលនិវត្តន៍នូវយន្តហោះប្រភេទ Boeing 737-800 របស់ខ្លួននៅដំណាច់ឆ្នាំនេះ ដោយជើងហោះហើរចុងក្រោយនៃយន្តហោះប្រភេទនេះគ្រោងនឹងធ្វើឡើងនៅថ្ងៃទី ២៥ ខែតុលា ឆ្នាំ ២០២៥ ពីទីក្រុង Kathmandu ប្រទេសនេប៉ាល់ ទៅកាន់ប្រទេសសិង្ហបុរី។

អាកាសចរណ៍សិង្ហបុរី បានដាក់ឲ្យដំណើរការយន្តហោះប្រភេទ Boeing 737-800 នេះជាលើកដំបូងបន្ទាប់ពីមានការច្របាច់បញ្ចូលគ្នាជាមួយក្រុមហ៊ុនអាកាសចរណ៍ SilkAir កាលពីឆ្នាំ ២០១៩។ ចាប់តាំងពីពេលនោះមក អាកាសចរណ៍សិង្ហបុរីក៏បានផ្លាស់ប្តូរ និងជំនួសបន្តិចម្តងពីយន្តហោះ Boeing 737-800 ជាមួយនឹងយន្តហោះ Boeing 737 MAX 8 ។

អាកាសចរណ៍ សិង្ហបុរី (Singapore Airlines) គឺជាក្រុមហ៊ុនអាកាសចរណ៍ជាតិរបស់ប្រទេសសិង្ហបុរី ដោយក្រុមហ៊ុនបាននឹងកំពុងដំណើរការយ៉ាងជោគជ័យជាមួយនឹងយន្តហោះចម្រុះជាច្រើនប្រភេទតួយ៉ាងដូចជា Airbus A350-900, A380 ព្រមទាំង Boeing B737-800, B737 MAX 8, B777-300ER និង B787-10 ។