12/10/2025
ကိုယ့်ဘာသာသာဖတ်ကြည့်တော့
အသက်ကြီးရင်မလွယ်ဘူး
● အိုး... ငါကြိုးစားပမ်းစားလုပ်ခဲ့သင့်တာ… လင်ဆုံးရှုံးခဲ့ရတဲ့ ပင်စင်လစာ ၁သိန်း ၃သောင်းရတဲ့ အသက် ၇၃ နှစ်ရှိ အချိန်ပိုင်း အလုပ်သမားဟောင်းရဲ့ “ခံစားချက်အမှန်" ●
မိတ်ဆွေတို့ရေ... စူပါမားကတ်မှာ ဈေးလျှော့ထားတဲ့ ပစ္စည်းတွေကို လိုက်ရှာဝယ်ရတာဟာ အသက် ၇၃ နှစ်အရွယ် အေ(A) (အေ(A)ဆန်)ရဲ့ ပျော်ရွှင်စရာလေးတစ်ခုပါ။ ပင်စင်လစာနဲ့ မလောက်ငှတဲ့ဘဝကို ဖြတ်သန်းနေရတဲ့ သူဟာ အတိတ်ကို ပြန်တွေးရင်း နောင်တတွေရနေပါတယ်။
သူမက “ငါငယ်ငယ်တုန်းက ကြိုးကြိုးစားစားနဲ့ ပိုက်ဆံရှာထားသင့်တာ” လို့ ပြောပါတယ်။ အေ(A) ရဲ့ ခင်ပွန်းဟာ တိုကျို(Tokyo)မြို့က ကုမ္ပဏီတစ်ခုမှာ အလုပ်လုပ်ခဲ့ပါတယ်။ ဝင်ငွေအကောင်းဆုံးအချိန်တွေမှာ ယန်း(yen) ၈၀၀ သောင်းကျော်ရခဲ့ပြီး ဘောနပ်စ်(bonus)တွေလည်း အများကြီးရခဲ့ပါတယ်။
သားနှစ်ယောက်က အိမ်ထောင်ခွဲနေကြပြီး သားတွေငယ်ငယ်တုန်းကတော့ အေ(A) ဟာ အိမ်မှာပဲနေပြီး အိမ်မှုကိစ္စတွေကို လုပ်ကိုင်ခဲ့ပါတယ်။ ခင်ပွန်းရဲ့ ဝင်ငွေနဲ့ဆိုတော့ ဘာမှမပူပင်ခဲ့ရပါဘူး။
“အကောင်းဆုံးအချိန်တွေကတော့ ဘတ်ဘယ်လ်(bubble) စီးပွားရေးကောင်းခဲ့တဲ့အချိန်တွေပဲ။ မိသားစုနဲ့ သူငယ်ချင်းတွေနဲ့အတူ ဟာဝိုင်အီ(Hawaii)၊ ဂူအမ်(Guam)၊ ဟောင်ကောင်(Hong Kong)နဲ့ စင်ကာပူ(Singapore) တွေအထိ သွားခဲ့ကြတယ်။ သာမန်လူတွေတောင် အဲဒီကို သွားနိုင်ခဲ့ကြတာဆိုတော့ တကယ်ကို ဇိမ်ကျခဲ့တာပဲ” လို့ သူက ပြန်ပြောပြပါတယ်။
ဒါပေမဲ့ ဘတ်ဘယ်လ်(bubble) စီးပွားရေးပျက်သွားတဲ့နောက်မှာ အခြေအနေတွေက ပြောင်းလဲသွားခဲ့ပါတယ်။ ခင်ပွန်းရဲ့ ဘောနပ်စ်(bonus)တွေ လျော့သွားတဲ့အတွက် အေ(A) လည်း အချိန်ပိုင်းအလုပ်ကို လုပ်ကိုင်ခဲ့ရပါတယ်။
“အိမ်ရာကို ဈေးအကြီးဆုံးအချိန်မှာ ဝယ်ခဲ့တာဆိုတော့ ချေးငွေပြန်ဆပ်ဖို့က ခက်ခဲတယ်။ သားတွေရဲ့ ပညာရေးစရိတ်တွေလည်း ရှိသေးတော့ စူပါမားကတ်မှာ တစ်ပတ်ကို ၃ ရက် cashier အလုပ်ကို လုပ်ခဲ့တယ်။ ဒါပေမဲ့ ကိုယ့်ရဲ့အနာဂတ်အတွက်ကိုတော့ သေချာမစဉ်းစားခဲ့မိဘူး။ တစ်နည်းနည်းနဲ့တော့ အဆင်ပြေသွားမှာပါလို့ တွေးခဲ့တာ။ နောက်ဆုံးတော့ အိုမင်းတဲ့ဘဝကို ရောက်လာခဲ့တယ်” လို့ သူက ဆိုပါတယ်။
ဒါပေမဲ့ ခင်ပွန်းဟာ အလုပ်ကနေ အနားယူပြီး ၃ နှစ်အကြာမှာ ကင်ဆာရောဂါ(cancer)နဲ့ ရုတ်တရက်ဆုံးပါးသွားခဲ့ပါတယ်။ အဲဒီတော့မှ တကယ့်အမှန်တရားကို ရင်ဆိုင်လိုက်ရပါတယ်။
လစာက တစ်လကို ၁သိန်း ၃သောင်း… “ပိုကြိုးစားပြီး ငွေစုထားသင့်တာ”
ခင်ပွန်းရဲ့ ကျန်ရစ်သူပင်စင်လစာက တစ်လကို ယန်း(yen) ၈သောင်းလောက်ပဲ ရပါတယ်။ ကိုယ့်ရဲ့ပင်စင်နဲ့ပေါင်းရင်တောင် တစ်လကို ယန်း(yen) ၁သိန်း ၃သောင်းမပြည့်ပါဘူး။ ခင်ပွန်းရဲ့ အငြိမ်းစားလစာက အိမ်ရာချေးငွေဆပ်ဖို့အတွက် ကုန်သွားပြီး စုထားမိတဲ့ငွေက ယန်း(yen) ၇၀၀ သောင်းလောက်ပဲ ရှိပါတယ်။
“အရင်တုန်းက ခင်ပွန်းရဲ့ ပင်စင်လစာရှိတော့ နည်းနည်းတော့ သက်သာသေးတယ်။ အဲဒါကို ခင်ပွန်းဆုံးသွားမှ သိတာ။ အခုတော့ ကိုယ်တိုင် အချိန်ပြည့်အလုပ်လုပ်ပြီး ပင်စင်ကို များများရအောင် လုပ်သင့်တာလို့ တွေးမိတယ်။ ပင်စင်ကို မထည့်ချင်လည်းရတဲ့အချိန်တွေတောင် ရှိခဲ့သေးတယ်။ ‘ငါတို့က ငယ်သေးတာပဲ’ လို့တွေးပြီး မထည့်ခဲ့ဘူး။ အဲဒီတုန်းက ယန်း(yen)နည်းနည်းလေးနဲ့ အခုဆိုရင် စိတ်အေးချမ်းသာဖြစ်နိုင်တာပေါ့။ ကိုယ့်ရဲ့ဈာပနစရိတ်ကို ချန်ထားချင်သလို ပြုစုစောင့်ရှောက်ပေးမယ့်သူလည်း မရှိရင် ဘယ်လိုလုပ်ရမလဲဆိုတာကိုလည်း ကြောက်နေမိတယ်… အဲဒါတွေကို တွေးကြည့်ရင် တတ်နိုင်သလောက် မသုံးဘဲထားမှ ဖြစ်မယ်” လို့ သူက ညည်းညူပါတယ်။
အခုတော့ ဈေးဝယ်စရိတ်ကို ချွေတာရင်း စူပါမားကတ်မှာ ဈေးလျှော့တဲ့အချိန်ကို စောင့်နေရတာက သူ့အတွက် ပျော်စရာလေးတစ်ခု ဖြစ်နေပါတယ်။
“အချိုတွေကို အရမ်းကြိုက်တယ်။ ကိတ်(cake)တို့၊ မုန့်လုံးရေပေါ်တို့လို မုန့်တွေကို ဈေးသက်သက်သာသာနဲ့ ဝယ်စားရတဲ့ရက်တွေဆိုရင် နည်းနည်းလောက် ဇိမ်ခံလိုက်ရသလို ခံစားရတယ်” လို့ သူက ပြုံးပြီးပြောပေမဲ့ သူ့ရဲ့အပြုံးနောက်မှာ နောင်တတွေ အများကြီးရှိနေပါတယ်။
“ငွေတွေကလည်း နည်းလာပြီ၊ ကိုယ်ကလည်း ဘယ်အချိန်အထိ အသက်ရှင်မယ်မသိဘူး။ ပိုက်ဆံအရင်ကုန်မလား၊ ကိုယ်အရင်သေမလားဆိုတာ မသိနိုင်ဘူး” လို့ သူက ဆိုပါတယ်။
အေ(A) ရဲ့ နောင်တတွေဟာ နောင်အိုမင်းမယ့်သူတွေအတွက် သင်ခန်းစာတစ်ခုပါပဲ။ ဘယ်လောက်ပဲ ဝင်ငွေကောင်းတဲ့အချိန်တွေ ရှိပါစေ၊ စိတ်မလျှော့ပါနဲ့။ ပြီးတော့ “အခုတော့ အဆင်ပြေနေသေးတယ်” လို့တွေးပြီး ငွေစုတာနဲ့ အလုပ်လုပ်တာကို နောက်မရွှေ့ပါနဲ့။ အေ(A) ဟာ သက်ပြင်းတိုးတိုးလေးချပြီး ဒီလိုပြောရင်း အဆုံးသတ်လိုက်ပါတယ်။
“ငယ်ငယ်တုန်းက အိုမင်းတဲ့အကြောင်းကို ဝေးဝေးလံလံက အနာဂတ်အကြောင်းလို့ပဲ ထင်ခဲ့တာ။ ဒါပေမဲ့ သတိထားမိတဲ့အချိန်မှာ အချိန်ရော ခွန်အားရော ပြန်မရနိုင်တော့ဘူး။ အဲဒီတုန်းက ငါ့ကို ပြောချင်တာက ‘နည်းနည်းဖြစ်ဖြစ် အလုပ်လုပ်ပါ၊ ပင်စင်လည်းထည့်ပါ၊ ဇိမ်ခံတာကိုလည်း လျှော့ပါ၊ ကိုယ့်ရဲ့အားနဲ့ အိုမင်းတဲ့ဘဝကို ထောက်ပံ့ဖို့ ပြင်ဆင်ထားပါ’ လို့ ပြောချင်တယ်”
#ဂျပန် #မြန်မာ #သတင်း
