15/05/2026
🇸🇩 *سَلَامَة سَلَامَة*....
فرع الحِنَّة البَتَّق ، وفَرهَد ،
وطَقَّتْ مِنَّنا رِيحة المَطَرَة ..
القيف اتمَدَّد ، دَفَر الرَّملة ،
الموية النادَتْ عِرق الشجَرة ..
وهوزَز موج النِّيل المُركَب ،
وكُنَّا جماعة بِنَكتِب ونَقرَا ..
وكان في كتاب مفتوح في الواطة ،
ودفتر ، وشنطة ، وخيط في إبرَة ..
وجرحك لسَّع نَيْ ، ما اترَتَّق ،
ونزَلَت دَمعَة ، ويااا للحسرة ..
وتوب البلد الواقع مِنَّها ،
كانت سَمحة وكايسة السُترَة ..
وفيها شَمِس يوماتي بتَشرِق ،
وفيها الليل ،
وحكاوي ،
وقَمرَة ..
ومدرسة فاضية ،
وخلوة حزينة ،
ولوح ودَوايَة اتدفَّق حِبِرَا ..
وكَمْ عَرّاقِي قديم ومَتَرَّبْ ،
وباقي لَدَايَة ، حَجَر للذكرَىٰ ..
وقَدَح المُونَة انكَفَىٰ علي وشُّو ،
ونُصّ الحيطة وقَع في حُفرَة ..
ونِحنَا جماعة بِنَكتِب ونَقرَا ..
رِكِبنا اللوري ، اتعَطَّل بينا ،
وكان مُحتاج بَسْ حِتَّة دَفرَة ..
إلّا الحيل في نزوحنا اتفَرَّق ،
واتجَهجَهنا كَمَان بالمَرَّة ..
عِرِفنا الغُربَة ،
دَخَلنا بيوتا ،
وكَمْ مِن رُوُح كانت مُنكَسرَة ..
وحول ، حولين ، وتلاتة ، ولِسَّة ،
والحَسَّابة بتَحسِب وتَقرَا ..
واتعَلّمنا النّوم بالجُّوع ،
والهَم ما بنوم ،
ووجَع ما بِبرَا ..
إلا الحِلِم الكان بيناهِد ،
مِن مشوارنا ، وحَفَظ البِذرة ..
جُوّة العين ارواح بتنادي ،
وضايقة المُرَّة الزّادَت صَبُرَا ..
وظَنَّهَا تَبْ ما خاب في الجّايي ،
وشايلة الفرحة عشان يوم بُكرة ..
يقِين بي الله ،
وحامدة وشاكرة ،
عَشَمْ في قلوب بي هناك مُنتَظرَة ..
بُشارة خير ، والغيمة بتضحَك ،
ولِسَّة عيوننا بذات النظرة ..
الوطن ، الإيِد
الوقفة ، العِيد
الشوق والرّيد
يا رب يا رب ، اللمَّة تزيد
والأمل الحَي في البِتْ الفكرة ..
وفرع الحِنَّة البَتَّق وفَرهَد ،
وطَقَّت مِنَّنا رِيِحة المَطَرة ..
سلامة سلامة ،
ونِحنا يمين كان قُمنا قِيامة ،
بَلادنا الغالية بنحمي حِماها ،
وساعة الجَّد بنقيف قِدَّامَا ،
وما بِنسيب الشَّر يغشاها ،
ح نعلِّيها ونبني بُناها ،
وتاني تقوم وتطيب آلامَا ،
وتكبَر بينا ، ونكبَر بيها ،
خلاص راجعين راجعين راجعين ،
راجعين الآن ، الآن ما بُكرة ......
نزار فتحي
05 مايو 2026
